Fana: At a Speed of Life!

ከጦላይ ስልጠና ማዕከል በጤና ችግር ሆስፒታል የገቡ የኦነግ ሰራዊት አባላት በጥሩ ጤና ላይ ይገኛሉ – የኦሮሚያ ክልል

አዲስ አበባ፣ ሚዚያ 7፣ 2011 (ኤፍ.ቢ.ሲ) በትናንትናው ዕለት ከጦላይ ስልጠና ማዕከል በጤና ችግር ሆስፒታል የገቡ የኦነግ ሰራዊት አባላት በጥሩ ጤና ላይ እንደሚገኙ የኦሮሚያ ክልል መንግስት አስታወቀ።

በጦላይ የስልጠና ማዕከል በስልጠና ላይ ከሚገኙ የኦነግ ሰራዊት አባላት ጤና ጋር በተያያዘ የኦሮሚያ ክልል መንግስት ኮሙዩኒኬሽን ጉዳዮች ቢሮ መግላጫ ሰጥቷል።

የኦሮሚያ ክልል መንግስት ኮሙዩኒኬሽን ጉዳዮች ቢሮ ሃላፊ አቶ አድማሱ ዳምጠው እንደገለጹት፥ በትናንትናው እለት ከጠዋቱ አንድ ሰዓት አካባቢ በጦላይ ስልጠና ማዕከል ውስጥ ያሉ የተወሰኑ የኦነግ ሰራዊት አበላት የጤና እክል ገጥሟቸው ሆስፒታል ገብተዋል።

በዚህ ስልጠና ማዕከል ከሚገኙ 1 ሺህ በላይ የኦነግ ሰራዊት አባላት ሰልጣኞች መካከል 136 ያህሉ በገጠማቸው የጤና ችግር በወሊሶ ሉቃስ ሆስፒታል የመጀመሪያ ደረጃ ህክምና አግኝተው በጥሩ ሁኔታ ላይ ይገኛሉ ነው ያሉት።

የክልሉ መንግስት የኦነግ ሰራዊት አባላቱን ወደ ስልጠና ቦታ ከማስገባቱ አስቀድሞ አስፈላጊ የሆኑ የምግብ፣ የመኝታና የስልጠና ግብዓቶችና መሰል ጉዳዮችን አሟልቶ መሆኑን ሀላፊው አስረድተዋል።

በስልጠና ማዕከሉ የተከሰተው ይህ የጤና ችግር መንስኤም በመጣራት ላይ ይገኛል ነው ያሉት።

አሁን ላይም የስልጠና ማዕከሉ መደበኛ የስልጠና ፕሮግራም እንደቀጠለ ነው ያሉት የቢሮ ሃላፊው ትናንት ከተፈጠረው የጤና ችግር ጋር በተያያዘ ህይወታቸው ያለፈና የከፋ ጉዳት የደረሰባቸው የሰራዊት አባላት እንዳሉ እየወጡ ያሉ መረጃዎች ሀሰት መሆናቸውን ተናግረዋል።

በጥበበስላሴ ጀምበሩ

You might also like
Comments
Loading...