Fana: At a Speed of Life!

ከውጭ የሚገባውን የስንዴ ምርት በሃገር ውስጥ መሸፈን የሚያስችል እቅድ ተዘጋጀ

አዲስ አበባ ፣ ሚያዚያ 12 ፣ 2011 (ኤፍ ቢ ሲ) ከውጭ የሚገባውን የስንዴ ምርት በአራት አመት ውስጥ ሙሉ ለሙሉ በሃገር ውስጥ ለመሸፈን የሚያስችል እቅድ ተዘጋጀ።

ግብርና ለተመዘገበው ሀገራዊ እድገት ትልቅ ድርሻ ቢያበረክትም እድገቱን ግን ማፋጠን አልተቻለም።

ከዝናብ ጥገኝነት ያልወጣው ይህ ዘርፍ የመካናይዜሽን ትኩረት ማጣት፣ የምርምር ውጤቶች አናሳ መሆንና ዘርፉ ላይ የሚስተዋሉ ሌሎች ተግዳሮቶች ብዙም እንዳይራመድ አድርገውታል።

የግብርና ሚኒስቴር ዘርፉ አሁንም ድረስ ከግብዓት አቅርቦት አንጻር እንኳን ተመጣጣኝ አለመሆኑን፥ የምሁራን ሚና ትናንት፣ ዛሬና ነገ በሚል መሪ ቃል መካሄድ በጀመረው መድረክ ላይ ገልጿል።

የግብርና ሚኒስትር ዲኤታው አቶ ሳኒ ረዲ ከማዳበሪያ አንጻር በሄክታር የሚገባውን ያህል መጠቀም አለመቻሉን ይናገራሉ።

ይህም ቢሆን ግን በዘላቂ የተፈጥሮ ሀብት ልማት አያያዝና አጠቃቀም 3 ነጥብ 6 ሚሊየን ተፋሰሶችን ለማዘጋጀት ታቅዶ ከእጥፍ በላይ ማሳካት መቻሉን ተናግረዋል።

በዘንድሮው የምርት ዘመንም ከ374 ሚሊየን ኩንታል በላይ ምርት ከዋና ዋና ሰብሎች ለማግኘት በቂ ዝግጅቶች እየተደረጉ ነው ብለዋል።

የአነስተኛ አርሶ አደሮችን ማሳ በመስኖ ለማልማት ከታቀደው የ1 ነጥብ 1 ሚሊየን ሄክታር መሬት ውስጥም ከእቅድ በላይ ማልማት መቻሉንም ከሚኒስቴሩ የተገኙ መረጃዎች ያመላክታሉ።

በመድረኩ ምሁራኑ የኢትዮጵያ የግብርና ዘርፍ በርካታ ሊሻገራቸው በሚገቡ ተግዳሮቶች ዙሪያ እንደሚገኝና ከዛ መውጣት እንደሚገባው ጠቁመዋል።

የግብርና ሚኒስትሩ አቶ ኡመር ሁሴን በበኩላቸው በተለይ ቴክኖሎጂን ለመጠቀምና ዘመናዊ የእርሻ ስርአትን ለመከተል በርካታ ዝግጅቶች እየተደረጉ መሆኑን ጠቁመው በአንዳንዶቹም ወደ ተግባር መገባቱን አንስተዋል።

ከምሁራን የሚገኙ ምሁራዊ ምክሮችን ለመጠቀም ይሰራል ያሉት ሚኒስትሩ፥ ይህ ውጤታማነቱ እየተረጋገጠ ሲሄድ ምርታማነትን እንደሚያሳድግ ጠቅሰዋል።

እንደ እቅድ የተያዘውም እስከ 4 አመት ባለው ጊዜ ውስጥ አሁን ሀገሪቱ ከውጭ የምታገስገባውን የስንዴ ምርት በሀገር ውስጥ መሸፈን ነው።

ሚኒስትሩ ይህን ውጤታማ ለማድረግ የሰነድ ዝግጅቶችን ጨምሮ መሰረታዊ ስራዎች መጀመራቸውን ጠቅሰው፥ በሰነዱ ላይ በየደረጃው ውይይት ከተደረገበት በኋላ ተግባራዊ ይደረጋል ብለዋል።

የግብርና ሚኒስቴር አሰራሩን በአዲስ መልክ እየፈተሸ ያሉበትን ችግሮች እየፈታ ዘርፉ የሚጠበቅበትን ድርሻ እንዲወጣ እንደሚሰራ ገልጿል።

በዚህ ላይ የምሁራን ሚና ጅማሮ ቀጣይነት እንዲኖረው ይደረጋልም ነው የተባለው።

 

በሃይለኢየሱስ ስዩም

 

 

You might also like
Comments
Loading...