Fana: At a Speed of Life!

ከእግር ኳስ ግጥሚያ ሲመለስ በነበረ የትግራይ ፖሊስ ዋልታ ቡድን ላይ በተከፈተ ተኩስ የአንድ ሰው ህይወት አለፈ 

አዲስ አበባ፣ ሚያዚያ 18፣ 2011 (ኤፍ.ቢ.ሲ)  የትግራይ ፖሊስ ዋልታ የእግር ኳስ ቡድንን ይዛ ከአዲስ አበባ ወደ መቐሌ ስትጓዝ በነበረች  ኮስተር  መኪና ላይ ማንነታቸው ያልታወቀ ታጣቂዎች ባደረሱት ጥቃት ጉዳት ደረሰ።

በአፋር ክልል ገዋኔ በተባለ ስፍራ ላይ በተሸከርካሪው ላይ ድንገት በተከፈተው ጥቃት የተለያዩ የቡድኑ አባላት ላይ ጉዳት ሲደርስ የአንድ ሰው ሕይወት ማለፉን የቡድኑ አሰልጣኝ ኮማንደር ገብሩ ካሕሳይ ለፋና ብሮድካስቲንግ ኮርፖሬት ተናግረዋል።

ጥቃቱ በደረሰበት ስፍራ የደረሱት የፀጥታ ሀይሎች ተጎጂዎችን ወደ ህክምና ተቋም በመውሰድ ድጋፍ እንዲያገኙ ማድረጋቸውም ተመልክቷል።

የትግራይ ፖሊስ ዋልታ የእግር ኳስ ቡድንን ይዛ ከአዲስ አበባ ወደ መቐሌ ስትጓዝ በነበረችው ተሽከርካሪ ላይ ጥቃት በመፈፀም ጉዳት ያደረሱትን ታጣዎች ለመያዝ ከሚመለከታቸው አካላት ጋር እንደሚሰራ የአፋር ክልል ገልጿል።

የክልሉ የመንግስት ኮሙዩኒኬሽን ጉዳዮች ቢሮ ሀላፊ አቶ አህመድ ካሎይታ ለፋና ብሮድካስቲንግ ኮርፖሬት እንዳስታወቁት፥ ትናንት 3 ሰዓት ከ30 አካባቢ  አንደፎ በተባለ ስፍራ የእግር ኳስ ተጫዋቾቹን በያዘቸው ተሽከርካሪ ላይ ታጣቂዎች ጉዳት ማድረሳቸውን ገልፀዋል።

ይህ የሀገሪቱን ገቢ እና ወጪ ንግድን በሚያስተናግደው መንገድ አካባቢ የፀጥታ ስጋት መፍጠር የሚፈልጉ ኮንትሮባንዲስቶች እንዳሉ በመግለፅ፥ መሰል አደጋዎች እየተደጋገሙ መምጣታቸውን አንስተዋል።

በመሆኑም የአካባቢውን የፀጥታ ሁኔታ አስተማማኝ ለማድረግ የፌደራል መንግስት ከሚመለከተው አካል ጋር በመሆን መስራት አለበት ነው ያሉት።

በትናንቱ አደጋ በደረሰው ጉዳት የክልሉ መንግስት አዝኗል ያሉት የቢሮ ሀላፊው፥ ህይወቱን ላጣው ቤተሰብ መፅናናትን፤ ለተጎጂዎች ደግሞ ፈጥኖ ማገገምን ይመኛል ብለዋል።

የክልሉ መንግስት ከሚመለከተው አካል ጋር በመሆን ይህንን ድርጊት የፈፀሙትን ለመያዝ እንደሚሰራም ነው ያረጋገጡት።

 

በዮናታን ግዛቸው

You might also like
Comments
Loading...