Fana: At a Speed of Life!

ከኢንዱስትሪ ፓርኮች የሚገኘው የውጭ ምንዛሬ እያደገ መምጣቱ ተገለፀ

አዲስ አበባ፣ ሚያዝያ 2፣ 2011 (ኤፍ.ቢ.ሲ) በኢትዮጵያ የተለያዩ ክፍሎች ወደ ስራ የገቡት የኢንዱስትሪ ፓርኮች በውጭ ምንዛሬ ግኝት፣በቴክኖሎጂ ሽግግር እና በስራ እድል ፈጠራ ከፍተኛ ተስፋ የተጣለባቸው ናቸው።

ከዚህ አንጻር ያላቸው አፈጻጸም ምን ይመስላል የሚለውን ፋና ብሮድካስቲንግ ኮርፖሬት ከኢንቨስትመንት ኮሚሽነሩ አበበ አበባየው ጋር  ቆይታ አድርጓል።

ኮሚሽነሩ የውጭ ምንዛሬን በተመለከተ እንደተናገሩት በፓርኮቹ ውስጥ የሚገኙት  ፋብሪካዎች ወደ ምርት ከገቡበት ጊዜ ጅምሮ የውጭ ምንዛሪን ግኝት በየወሩ እድገት እያሳየ መምጣቱን ተናግረዋል፡፡

በታህሳስ ወር 2011 አመተ ምህረት 16 ነጥብ 4 ሚሊየን ዶላር ለማግኘት ታቅዶ 13 ነጥብ 8 ሚሊየን ዶላር መገኘቱ ከኮሚሽኑ የተገኘ መረጃ ያመለክታል፡፡

ይህም የውጭ ምንዛሬ ግኝት ከሃዋሳ፣ አዳማ፣ መቀሌ፣ ኮምቦልቻ፣ ቦሌ ለሚ፣ ኢስተርን፣ ጆርጅ ሹ፣ ሁጅያን፣  እና ቬሎሲቲ ኢንዱስትሪ ፓርኮች የተገኘ ነው ተብሏል።

ፒ ቪ ኤች የተባለው ታዋቂ አምራች ኩባንያ ከ600 መቶ ሺህ ዶላር በላይ በማስገባት ቀዳሚነት መሆኑ ተነግሯል።

ኢንዱስትሪ ፓርኮቹ በቴክኖሎጂ ሽግግር በኩልም አዎንታዊ ስራ እየተሰራባቸው መሆኑን  ኮሚሽነሩ ተናግረዋል፡፡

አቶ አበበ በአሁኑ ወቅት በዘመናዊ ቴክኖሎጂ የሚመራው የማምረቻ ዘርፍ  በሀገር ልጆች አንቀሳቃሽነት እየተሰራ መሆኑን ገልፀዋል፡፡

ከስራ እድል ፈጠራ አንጻርም ፓርኮቹ በአንድ ወይም ሁለት ፈረቃ ብቻ ቀላል የማይባል የሰው ሃይል መቅጠር መቻላቸውን ነው የሚያነሱት፤

ፓርኮቹ በሙሉ አቅም እና ከአንድ በላይ በሆነ ፈረቃ መስራት ሲጀምሩ የሚቀጥሩት የሰው ሃይል ከፍ ሊል እንደሚችል ተናግረዋል፡፡

በተመሳሳይ የኮሚሽኑ ወርሃዊ እቅድ እና የታህሳስ ወር አፈጸጸም ሪፖርት እንደሚያመለክተው ሊቀጠሩ ይችላሉ ሲል ያስቀመጠው 5 ሺህ 949 ሰዎችን ሲሆን 4 ሺህ 735 ሰዎች መቅጠር ተችሏል፡፡

 

በትእግስት አብርሃም

 

You might also like
Comments
Loading...