Fana: At a Speed of Life!

ከልክ ያለፈ እንቅልፍ የሚያመጣቸው ችግሮች

አዲስ አበባ፣ መጋቢት 23፣ 2011 (ኤፍ.ቢ.ሲ) በዓለም ዙሪያ በየጊዜው እንቅልፍን የተመለከቱ ዓይነታቸው የተለያየ የምርምር ስራዎች ይወጣሉ።

ከምርምር ስራዎቹ መካከልም ልክ ያለፈ እንቅልፍ የሚያስከትለውን ችግር የተመለከተው አንዱ ነው።

በርግጥ ብዙ ጊዜ አነስተኛ የእንቅልፍ ጊዜ የተመለከቱ እና እሱን ተከትለው የሚመጡ ተያያዥ ችግሮችን የሚያሳዩ የምርምር ስራዎች በስፋት ይፋ መሆናቸው ይታወቃል።

እንዲሁም አብዛኛዎቹ የምርምር ስራዎችም አማካይ የእንቅልፍ ሰዓትን ከሰባት እስከ ስምንት ሰዓታት መሆኑን በጥናታቸው ዳሰዋል።

ታዲያ አብዝቶ መተኛት በተለምዶ ስንፍና የሚባለው ከሚያስከትላቸው ችግሮች አንደኛው ስትሮክና የልብ ህመም ነው ተብሏል።

ከስምንት ሰዓታት በላይ የሚተኙት ከስምንት ሰዓታት በታች ከሚተኙት ይልቅ በስትሮክ 48 በመቶ እና በልብ ህመም ደግሞ 38 በመቶ የመያዝ ዕድል እንዳላቸው ጥናቶች አሳይተዋል።

ከልክ ያለፈ እንቅልፍ ከሚያስከትላቸው ችግሮች መካከል ሁለተኛው ጥሩ እንቅልፍ ማጣት ነው ተብሏል።

ይህ ማለት አንድ ሰው ረዥም ሰዓት አልጋ ላይ ሊያሳልፍ ይችላል፤ ነገርግን ጥሩ የሚባል የእንቅልፍ ሰዓት አይኖረውም፤ ለዚህ ምክንያቱ ከአተነፋፈስ፣ ከህመም፣ የአካባቢ ምቹ ያለመሆን እና ሌሎችም ሊሆኑ ይችላሉ።

በሦስተኛነት የሚያስከትለው ችግር ደግሞ ለውፍረት ይዳርጋል፤ ይህ ደግሞ የሚለየው ለውፍረት የተጋለጡ ሰዎች በተመሳሳይ ረጅም ሰዓት መተኛታቸው መሆኑን ጥናቶች አሳይተዋል።

ለስድስት ዓመት በተደረገ ጥናት ከስምንት ሰዓታት በላይ የሚተኙት ከስምንት ሰዓታት በታች ከሚተኙት ይልቅ 21 በመቶ ለውፍረት የመጋለጥ እድል አላቸው ተብሏል።

ከልክ ያለፈ እንቅልፍ የሚያስከትለው አራተኛው ችግር ደግሞ በስኳር ህመም የመያዝ ዕድል በእጥፍ መጨመሩ ሲሆን፥ በደም ውስጥ ያለውን የግሉኮስ መጠን ላይ እክል ይፈጥራል።

አምስተኛው ችግር በራስ ምታት መሰቃየትን ማስከተሉ ሲሆን፥ ይህም የሚሆነው በመደበኛነት የሚደረጉ ነገሮች ሲስተጓጎሉበት የሚከሰት መሆኑን በጥናታቸው አሳይተዋል።

ድብርት፣ የጀርባ ህመም፣ የአዕምሮ ንቁ ሆኖ ያለመስራት እና ከፍተኛ የድካም ስሜት ከልክ ያለፈ እንቅልፍ ከሚያስከትላቸው ችግሮች ውስጥ ይገኙበታል።

በእንቅልፍ ላይ ምርምራቸውን የሰሩ ባለሙያዎች እንደሚሉት ከሆነ ከልክ ያለፈ እንቅልፍ የሚያስከትላቸውን ችግሮች በቀላሉ ሰዎች ከመያዛቸው በፊት ሊቀረፉ የሚችሉ በመሆናቸው ትኩረት እንዲሰጧቸው አሳስበዋል።

 

ምንጭ፦ሪደርዳይጀስት

በአብርሃም ፈቀደ

You might also like
Comments
Loading...