Fana: At a Speed of Life!

ኢትዮጵያ በፈረንጆቹ 2020 ዓለም አቀፉን የባለ ልዩ ጣዕም ቡና ውድድርን ልታስተናግድ ነው

አዲስ አበባ ፣ ሚያዚያ 4፣ 2011 (ኤፍ ቢ ሲ) ኢትዮጵያ በፈረንጆቹ 2020 ዓለም አቀፉን የባለ ልዩ ጣዕም ቡና ውድድርን ልታስተናግድ ነው።

ዛሬ በዩናይትድ ስቴትስ ቦስተን ከተማ ዓለም አቀፉ የባለ ልዩ ጣዕም ቡና አክስፖ በይፋ ተጀምሯል።

በዓለም አቀፉ የቡና አቀነባባሪዎች ማህበር በተዘጋጀው በዚህ ግዙፍ ኤክስፖ ላይ ቡና በማምረት እና በማቀነባበር እንዲሁም ለዘርፉ ትክኖሎጂን የሚያመርቱ ኩባንያዎች በመሳተፍ ላይ ይገኛሉ።

ኢትዮጵያም በቡና ዘርፍ ላይ የተሰማሩ በ50 ኩባንያዎች በኤክስፖው ላይ ተወክላለች።

በኢፌዴሪ የንግድ ሚኒስትር ዴኤታ አምባሳደር ምስጋናው አረጋ እና በኢትዮጵያ ቡናና ሻይ ባለስልጣን ዋና ዳይሬክተር ዶክተር አዱኛ ደበላ የተመራው ኢትዮጵያ ልዑክ የሀገሪቱን የቡና ኢንዱስትሪን ለዓለም ገበያ በማስተዋወቅ ላይ ይገኛል።

ከኤክስፖው መክፈቻ ጎን ለጎን በተከናወነ ስነ ስርዓትም ኢትዮጵያ በፈረንጆቹ 2020 የሚካሄደውን ዓለም አቀፉን የባለ ልዩ ጣዕም ቡና ውድድር ለማስተዋወቅ ከከፕ ኦፍ ኤክሰልንስ ኩባንያ ጋር ስምምነት ተፈራርማለች።

ስምምነቱን የኢትዮጵያ ቡናና ሻይ ባለስልጣን ዋና ዳይሬክተር ዶክተር አዱኛ ደበላ እና የኩባንያው ዋና ዳይሬክተር ዳረን ዳንኤል ተፈራርመዋል።

በፊርማ ስነ ስርዓቱ ላይ አምባሳደር ምስጋናው አረጋ ሁነቱ የኢትዮጵያ ቡና በዓለም ገበያ ተገቢውን ዋጋ እንዲያገኝ እንደሚያግዝ ተናገረዋል።

ዶክተር አዱኛ ደበላ በበኩላቸው የቡና አምራች ገበሬዎች የሚገባቸውን ጥቅም እንዲያገኙ ኢትዮጵያ ከኩባንያው ጋር እንደምትሰራ አስታውቀዋል።

የኩባንያው ዋና ዳይሬክተር ዳረን ዳንኤልም ተቋማቸው የኢትዮጵያን ባለ ልዩ ጣዕም ቡናን በዓለም አቀፍ ደረጃ ማስተዋወቅ ከፍተኛ ትኩረት እንደሚሰጠው መጠቆማቸውን የፋና ብሮድካስቲንግ ኮርፖሬት ባልደረባ ከስፍራው ያደረሰን መረጃ ይጠቁማል።

You might also like
Comments
Loading...