Fana: At a Speed of Life!

አንድ የሩሲያ ቴሌቪዥን ጣቢያ የሮቦት ዜና አቅራቢን አስተዋወቀ

አዲስ አበባ፣ ሚያዚያ 11፣ 2011 (ኤፍ.ቢ.ሲ) አንድ የሩሲያ ቴሌቪዥን ጣቢያ አሌክስ የተሰኘ የሮቦት ዜና አቅራቢን አስተዋውቋል።

ሩሲያ -24 የተሰኘው የሩሲያ ቴሌቪዥን ጣቢያ አሌክስ የተባለ የሮቦት ዜና አቅራቢን ሰሞኑን ለተከታታዮቹ አስተዋውቋል።

ሮቦቱ ፔርም በተሰኘችው ከተማ በሚገኘው ፕሮሞቦት በተሰኘ የቴክኖሎጂ ኩባንያ የተመረተ ነው ተብሏል።

ዜና አቅራቢ ሮቦቱ የተሰራው አሌክሲ ዩዝሃኮቭ ከተባለው የድርጅቱ መስራች የፊት ገፅታ ጋር በማመሳሰል መሆኑም ነው የተነገረው።

ሮቦቱ የፊት ገፅታውንና አንገቱን ብቻ ማንቀሳቀስ የሚችል ሲሆን፥ በሩሲያ የቴሌቪዥን ታሪክ የመጀመሪያው የሮቦት ዜና አቅራቢ ሆኖ ተመዝግቧል።

ለሙከራ የቀረበው ሮቦት ሙሉ ስራው ሲጠናቀቅ እንደ ትክክለኛ ዜና አቅራቢ የፊት ገፅታውን፣ እጆቹን እንዲሁም አንገቱን ማንቀሳቀስ ይችላል ነው የተባለው።

ኩባንያው ሮቦቱን መገጣጠም የጀመረው በፈረንጆቱ 2017 ሲሆን፥ ሙሉ ስራውንም በያዝነው ዓመት መጨረሻ ላይ ይፋ ያደርጋል ተብሎ ይጠበቃል።

የሮቦት ዜና አቅራቢው 12 ሺህ ዶላር ዋጋ የተቆረጠለት ሲሆን፥ በአሁኑ ወቅትም  12 ሮቦቶችን ለመስራት ትዕዛዝ መቀበሉን ጠቁሟል።

ምንጭ ፦ቢቢሲ

You might also like
Comments
Loading...