Fana: At a Speed of Life!

አልጀሪያ ከፀረ ሙስና ዘመቻ ጋር በተያያዘ አምስት ቢሊየነሮችን በቁጥጥር ስር አዋለች

አዲስ አበባ ፣ ሚያዚያ 14 ፣ 2011 (ኤፍ ቢ ሲ) አልጀሪያ ከጀመረችው ፀረ ሙስና ዘመቻ ጋር በተያያዘ አምስት ቢሊየነሮችን በቁጥጥር ስር አዋለች።

ለቀድሞው ፕሬዚዳንት አብዱላዚዝ ቡተፍሊካ ቅርብ ናቸው የተባሉት አምስቱ ቢሊየነሮች በሃገሪቱ እየተካሄደ ካለው የፀረ ሙስና ዘመቻ ጋር በተያያዘ በቁጥጥር ስር መዋላቸውን የሃገሪቱን ቴሌቪዥን ጣቪያ ዋቢ ያደረገው የሬውተርስ ዘገባ ያመላክታል።

ኢሳድ ሬብረብ የተባሉትን ባለሃብት ጨምሮ ኩኒነፍ ከተሰኘው ቤተሰብ የተገኙ አራት ቢሊየነሮች በቁጥጥር ስር የዋሉ ሲሆን፥ በሃገሪቱ ተመዝብሯል ከተባለ ገንዘብ ጋር በተያያዘ ማጣራት ይደረግባቸዋል ተብሏል።

የሃገሪቱ ጦር ጠቅላይ ኤታማዦር ሹም ሌተናል ጀኔራል ጋይድ ሳላህ፥ ባለፈው ሳምንት የቡተፍሊካ አስተዳደር ባለስልጣኖች በሙስና ወንጀል ለፍርድ ይቀርባሉ የሚል ግምት አለኝ ሲሉ እንደነበር የሚታወስ ነው።

የሃገሪቱ ፍርድ ቤት የቀድሞውን ጠቅላይ ሚኒስትር አህመድ ኦያህያን እና የአሁኑን የገንዘብ ሚኒስትር ሞሃመድ ሉካልን ከገንዘብ ምዝበራ ጋር በተያያዘ ማጣራት እንዲደረግባቸው ማዘዙ ይታወሳል።

የቀድሞው የሃገሪቱ ፕሬዚዳንት አብዱላዚዝ ቡተፍሊካ ከ20 አመታት የስልጣን ቆይታ በኋላ ከሁለት ሳምንት በፊት በህዝብ ተቃውሞ ከስልጣን ወርደዋል።

እርሳቸውን ተክተውም አብድልካድር ቤንሳላህ ፕሬዚዳንታዊ ምርጫ እስከሚካሄድ ድረስ ለ90 ቀናት በጊዜያዊነት ተሾመዋል።

ተቃዋሚዎች ግን በዚህ ሹመትም ደስተኛ አይደሉም፤ እርሳቸውን ጨምሮ የቡተፍሊካ ዘመን ባለስልጣን የነበሩት ከስልጣን እንዲወገዱ ይፈልጋሉና።

ከዚህ ባለፈም ከባለሃብቶች ጋር በመሆን ፈጽመውታል ላሉት የሙስና ወንጀል በህግ እንዲጠየቁም ድምጻቸውን እያሰሙ ነው።

 

 

ምንጭ፦ ሬውተርስ

 

You might also like
Comments
Loading...