Fana: At a Speed of Life!

ተመድ 325 ስደተኞችን ከትሪፖሊ የግጭት ቀጠና ማስወጣቱ ተገለጸ

አዲስ አበባ፣ ሚያዚያ 17፣ 2011 (ኤፍ.ቢ.ሲ) የተባበሩት መንግስታት የስደተኞች ኤጄንሲ 325 ስደተኞችን ከትሪፖሊ የግጭት ቀጠና ማስወጣቱ ተገለጸ፡፡

ስደተኞቹ የአካባቢው ወቅታዊ የጸጥታ፣ደህንነትና የእስር ቤት አያያዝ ጉዳይ በተመለከተ ተቃውሞ ማድረጋቸውን ተክትሎ በታጠቁ ሃይሎች ጥቃት እንደተፈፀመባቸው ከተገለጸ በኋላ ÷ ከግጭት ቀጠናው መውጣታቸው ተነግሯል፡፡

በደቡብ ትሪፖሊ ዳርቻ አካባቢ በጄኔራል ካሊፍ ኻፍታርና መቀመጫውን ትሪፖሊ ባደረገው የሊቢያ መንግስት ጦር መካከል ግጭት በሚካሄድበት አካባቢ እንደነበሩም ተገልጿል፡፡

በዚህም 325 ስደተኞች ቃስር ቢን ግሃሺር ከተባለው እስር ቤት በሰሜን ምስራቅ ሊቢያ አካባቢ ወደ ሚገኘው አዝ-ዛዊያህ እስር ቤት ተዛውረዋል ነው የተባለው፡፡

በጄኔራል ካሊፍ ኻፍታር ጦር እና መቀመጫውን ትሪፖሊ ባደረገው መንግስተ ጦር መካከል የተቀሰቀሰው ግጭት እንደቀጠለ ነው ተብሏል፡፡

አሁን ላይ 3ሺህ ያህል ስደተኞች ትሪፖሊ ውስጥ በተለያዩ እስር ቤቶች እንደሚገኙም ይነገራል፡፡

የሀገሪቱ ሰላምና ደህንነት ችግር ከጊዜ ወደ ጊዜ እየተባባሰ በመምጣቱም በእስር ላይ ያሉ ስደተኞች ህይወት የከፋ ስጋት ላይ ጥሏል ነው የተባለው፡፡

የተባበሩት መንግስታት ድርጅት የስደተኞ አጄንሲ የስደተኞችን የህይወት ስጋት ለመቀነስ ባለፉት ሁለት ሳምንታት ባከናዎነው ተግባር ሌሎች 825 ስደተኞች ከግጭት ቀጠናው ማውጣቱን ዘገባው አስታውሷል፡፡

ምንጭ፡- አልጀዚራ

You might also like
Comments
Loading...