Fana: At a Speed of Life!

ባለፈው ቅዳሜና እሁድ ብቻ 17 ሺህ 600 ኩንታል ምግብ ለጌዴኦ ዞን ተፈናቃዮች ተልኳል

አዲስ አበባ ፣ ሚያዚያ 4 ፣ 2011 (ኤፍ ቢ ሲ) የአደጋ ስጋት ስራ አመራር ኮሚሽን ባሳለፍነው ቅዳሜና እሁድ ብቻ 17 ሺህ 600 ኩንታል አስቸኳይ የምግብ አቅርቦት ለጌዴኦ ዞን ተፈናቃዮች መላኩን ገለጸ።

ተፈናቃዮችን በሁለት ወራት ውስጥ ወደ ቀድሞ መኖሪያ ቀያቸው ለመመለስ ታቅዶ እየተሰራ መሆኑንም አስታውቋል።

የአደጋ ስጋት ስራ አመራር ኮሚሽን ኮሚሽነር አቶ ምትኩ ካሳ እንደተናገሩት ለጌዴኦ ተፈናቃዮች የሰብአዊ እርዳታው ቀጥሏል።

ለዚህም ባሳለፍነው ቅዳሜና እሁድ ብቻ በ44 ተሽከርካሪዎች ዱቄት፣ አልሚ ምግብና ዘይት ጭኖ ወደ ጌዴኦ ዞን ማምራቱን ገልጸዋል።

በዞኑ ቀደም ሲል ተፈናቅለው ለሚገኙ መደበኛ እርዳታ እንዲሁም አዲስ ለተፈናቀሉት ደግሞ አስቸኳይ ሰብአዊ እርዳታ እየተደረገ ነው።

አዲስ ለተፈናቀሉ ወገኖች ለኮሚሽኑ መጋቢት 1 ቀን 2011 የእርዳታ ጥያቄ ቀርቦ ከማግስቱ ጀምሮ ሰብአዊ እርዳታ የማቅረብ ስራ በመከናወን ላይ ይገኛልም ነው ያሉት።

እንደ አቶ ምትኩ ገለፃ የእርዳታ ስራውን ለማሳለጥ እንዲቻል በዞኑ የአስቸኳይ ጊዜ አደጋ ምላሽ ማስተባበሪያ ማዕከል በማቋቋም ሰብአዊ እርዳታውን በቅርበት በመከታተል እየተሰራ ነው።

በመሆኑም ሰብአዊ እርዳታው በምግብ አቅርቦት፣ የመጠለያ፣ የውሃና የህክምና አገልግሎት በመስጠት ላይ ነው ብለዋል።

ሰብአዊ እርዳታው እንዳለ ቢሆንም ችግሩን በዘላቂነት መፍታት እንዲቻል ተፈናቃዮችን በሁለት ወራት ውስጥ ወደ ቀያቸው በመመለስ የማቋቋም እየተሰራ መሆኑንም ኮሚሽነሩ አስረድተዋል።

ይሁን እንጂ ተፈናቃዮችን ወደቀያቸው የመመለስ ተግባሩ እንዲሳካ፤ ፀጥታን የማስከበርና የህግ የበላይነትን የማረጋገጥ ስራ ለነገ የማይባል መሆን አለበት ነው ያሉት።

ሰላም በሌለበት ማንኛውንም የልማት ተግባር ማከናወን አስቸጋሪ መሆኑን የጠቆሙት ኮሚሽነሩ በተለያዩ አካባቢዎች የሚስተዋሉ ግጭቶች ለመንግስት ከባድ ሸክም እየሆኑ መምጣታቸውንም ጠቁመዋል።

በአሁኑ ጊዜ በጌዴኦ ዞን ብቻ 675 ሺህ 737 ተፈናቃዮች መኖራቸውን ከኮሚሽኑ ያገኘነው መረጃ ያመለክታል።

ምንጭ፡- ኢ ዜ አ

You might also like
Comments
Loading...