Fana: At a Speed of Life!

በጋምቤላ ክልል 52 ክላሽንኮቭ ጠመንጃዎችንና 10 ኪሎ ግራም ሐሺሽ ተያዘ

አዲስ አበባ፣ ሚያዚያ 11፣ 2011 (ኤፍ.ቢ.ሲ) በጋምቤላ ክልል 52 ክላሽንኮቭ ጠመንጃዎች 10 ኪሎ ግራም ሐሺሽን ጨምሮ ከሁለት ተጠርጣሪዎች ጋር በቁጥጥር ሥር ማዋሉን የክልሉ ፖሊስ ኮሚሽን አስታወቀ።

በተጨማሪም ከአንድ ሺህ በላይ የብሬን መትረየስና ክላሽንኮቭ ጥይቶች ተይዘዋል።

በክልሉ እየተበራከተ የመጣውን ሕገ ወጥ የጦር መሳሪያዎች ዝውውር ለመግታት ኮሚሽኑ ከሕዝቡና ጸጥታ አካላት ጋር በቅንጅት እየሰራ መሆኑንም ገልጿል።

የኮሚሽኑ ምክትል ኮሚሽነር ቱት ኮር እንደገለጹት የጦር መሳሪያዎቹና ሐሺሹ በቁጥጥር ሥር የዋሉት ከሕዝብ በደረሰ ጥቆማና በኬላዎች በተደረገ ፍተሻ ነው ።

የጦር መሣሪዎቹና ሐሺሹን ከሁለት ተጠርጣሪዎች ጋር በቁጥጥር ሥር የዋሉት ከሚያዚያ 6 እስከ 9፣ 2011 ዓ.ም ባለው ጊዜ ውስጥ መሆኑን ተናግረዋል።

የጦር መሣሪዎቹ የተያዙት በባጃጅ ተሽከርካሪዎችና አዘዋዋሪዎች በሸክም ይዘው በመንቀሳቀስ ላይ እያሉ መሆኑም ተገልጿል፡፡

ሐሺሹ ደግሞ ከአዲስ አበባ በሕዝብ ማመላለሻ በመኪና ጎማ ውስጥ ተደብቆ ተጭኖ ወደ ጋምቤላ ከተማ በመግባት ላይ እንደነበረም ነው ምክትል ኮሚሽነሩ የሚናገሩት ።

በቁጥጥር ስር የዋሉት ሁለት ተጠርጣሪዎች ጉዳያቸው በመጣራት ላይ እንደሚገኝ አስረድተዋል።

በሌሎች ተጠርጣሪዎች ላይ ክትትል እየተደረገባቸው መሆኑንም ምክትል ኮሚሽነሩ ተናግረዋል።

ኮሚሽኑ ክልሉ ከደቡብ ሱዳን ጋር ሰፊ የድንበር ወሰን ያለው ከመሆኑ ጋር ተያይዞ እየተስፋፋ ያለውን ሕገ- ወጥ የጦር መሣሪያዎች ዝውውር ለመግታት ከሕዝብና ከፌደራል የጸጥታ አካላት ጋር በቅንጅት በመሥራት ላይ መሆኑን ገልጸዋል።

ምንጭ፡- ኢ ዜ አ

You might also like
Comments
Loading...