Fana: At a Speed of Life!

በዓለም ውድ ዋጋ ያስከፈለው የትዳር ፍቺ

አዲስ አበባ ፣ መጋቢት 27 ፣ 2011 (ኤፍ.ቢ.ሲ) ቢሊየነሩ የአማዞን ባለቤት ጄፍ ቤዞስና የትዳር አጋሩ ማኬንዚ ትዳራቸውን ለማፍረስ መስማማታቸው ተሰምቷል።

በትዳር ህይወት ውስጥ በጥንዶች መካከል በሚከሰቱ አለመግባባቶች ምክንያት ትዳር አደጋ ውስጥ ሊወድቅ ይችላል ።

ጥንዶቹ መግባባት በማይችሉበት ደረጃ ላይ ሲደርሱም ትዳራቸውን አፍርሰው እስከመለያት ሊደርሱ ይችላሉ።

ቢሊየነሩ ጄፍ ቤዞስና ማኬንዚም በመካከላቸው በተፈጠረ አለመግባባት ምክንያት ትዳራቸውን ለማፍረስ መስማማታቸውን ጄፍ በትዊተር ገጹ አስፍሯል።

ፍቺው ሲፈፀምም የጄፍ ቤዞስ ባለቤት በጋራ ካፈሩት ሀብት ውስጥ የድርሻዋ የሆነውን 35 ቢሊየን ዶላር ታገኛለች ተብሏል።

ይህም በአለም በትዳር ፍቺ የተገኘ የመጀመሪያው ትልቁ የሀብት መጠን ይሆናል ነው የተባለው ።
ማኬንዚን ከፍቺው የምታገኘው 35 ቢሊየን ዶላርም ከዓለማችን ሀብታም ሴቶች ዝርዝር ውስጥ የሚያካትታት መሆኑ ተነግሯል።

ከዚህ ባለፈም ማኬዚን በኢንተርኔት ግብይት ቀዳሚ በሆነው አማዞን ያላት አራት በመቶ ድርሻ የሚጠበቅላት ይሆናል።

ከዚህ በፊት ትዳሩን ለማፍረስ ውድ ዋጋ የከፈለው የኪነ ጥበብ ስራዎችን በማሻሻጥ የሚታወቀው አሌክ ዋይልደን አንስታይ ሲሆን፦ለፍቺውም 3 ቢሊየን ዶላር መክፈሉ ይታወሳል።

ምንጭ ፦ቢቢሲ

You might also like
Comments
Loading...