Fana: At a Speed of Life!

በውጭ ሃገራት የግሉ ዘርፍ ኢንቨስትመንት ኮርፖሬሽን የአፍሪካ ሴቶችን አቅም ማጎልበት የሚያስችል ፕሮጀክት ይፋ አደረገ

አዲስ አበባ ፣ ሚያዚያ 7 ፣ 2011 (ኤፍ ቢ ሲ) በውጭ ሃገራት የግሉ ዘርፍ ኢንቨስትመንት ኮርፖሬሽን የአፍሪካ ሴቶችን አቅም ማጎልበት የሚያስችል ፕሮጀክት ይፋ አደረገ።

ፕሮጀክቱ ዛሬ በአዲስ አበባ የአፍሪካ ኢኮኖሚክ ኮሚሽን አዳራሽ የአሜሪካው ፕሬዚዳንት ልጅ እና አማካሪ ኢቫንካ ትራምፕ፣ ፕሬዚዳንት ሳህለወርቅ ዘውዴ፣ የኮርፖሬሽኑ ጊዜያዊ ፕሬዚዳንት ዴቪድ ቦሂጂያን እና የአፍሪካ ሴት ስራ ፈጣሪዎች በተገኙበት ይፋ ሆኗል።

በ350 ሚሊየን ዶላር የሚተገበረው ፕሮጀክት ሴት ስራ ፈጣሪዎች 1 ቢሊየን ዶላር እንዲሰበስቡ የሚያስችል ነው ተብሏል።

በዚህ ፕሮጀክትም ኢትዮጵያን ጨምሮ ከሰሃራ በታች በሚገኙ የአፍሪካ ሃገራት በሴቶች ብቻ የሚንቀሳቀሱ የስራ ፈጠራ ፕሮግራሞች ድጋፍ ይደረግላቸዋል።

ከዚህ ባለፈም የሴቶችን አቅም ለማጠናከር የሚያግዙ ስልጠናዎችና ኢኮኖሚያዊ ተጠቃሚነታቸውን የሚያሳድጉ ፕሮግራሞች እንደሚተገበሩበት ከአሜሪካ ኤምባሲ ያገኘነው መረጃ ያመላክታል።

ባለፈው የፈረንጆቹ አመት የተቋቋመው ኮርፖሬሽኑ በታዳጊ ሃገራት የሚገኙ ሴቶችን ኢኮኖሚያዊ ተጠቃሚነት ማሳደግ የሚያስችል የ1 ቢሊየን ዶላር ድጋፍ አድርጓል።

ፕሮጀክቱ ይፋ በሆነበት ወቅት ኢቫንካ ትራምፕ ከፕሬዚዳንት ሳህለወርቅ ዘውዴ እና ሴት ስራ ፈጣሪዎች ጋር ውይይት አድርገዋል።

 

You might also like
Comments
Loading...