Fana: At a Speed of Life!

በኢትዮጵያ ፕሪምየር ሊግ መቐለ 70 እንደርታና ፋሲል ከነማ ድል ቀንቷቸዋል

አዲስ አበባ፣ ሚያዚያ 13፣ 2011 (ኤፍ.ቢ.ሲ) በኢትዮጵያ ፕሪምየር ሊግ 21ኛ ሳምንት ጨዋታዎች በዛሬው እለትም ቀጥለው ተካሂደዋል።

በዛሬው እለት ሁለት ጨዋታዎች የተካሄዱ ሲሆን፥ ጨዋታዎቹም በመቐለ እና በአዲስ አበባ ስታዲየሞች ነው የተካሄደው።

በመቐለ ዓለም አቀፍ ስታዲየም የተካሄደው ጨዋታም መቐለ 70 እንደርታን ከአዳማ ከተማ ያገናኘ ሲሆን፥ ጨዋታውም በባለሜዳዎቹ መቐለ 70 እንደርታ አሸናፊነት ነው የተጠናቀቀው።

መቐለ 70 እንደርታ ጨዋታውን 2 ለ 1 በሆነ ውጤት ያሸነፈ ሲሆን፥ የመቐለ 70 እንደርታን የማሸነፊያ ጎሎችንም አማኑኤል ገብረሚካኤል በ11ኛው ደቂቃ በፍፁም ቅጣት ምት እንዲሁም ያሬድ ከበደ በ88ኛው ደቂቃ አስቆጥረዋል።

የአዳማ ከተማን ብቸኛ ጎል ደግሞ አዲስ ህንፃ በ76ኛው ደቂቃ ከመረብ አሳርፏል።

በአዲስ አበባ ስታዲየም የተካሄደው የመከላከያ እና የፋሲል ከነማ ጨዋታ ደግሞ በፋሲል ከነማ አሸናፊነት ነው የተጠናቀቀው።

ፋሲል ከነማ ጨዋታውን 4ለ0 በሆነ ሰፊ የግብ ልዩነት ነው መከላከያን በሜዳው ያሸነፈው።

በጨዋታው ላይም የፋሲል ከነማን የማሸነፊያ ጎሎች ኤፍሬም አለሙ በ4ኛው ደቂቃ፣ ኢዙካ ኢዙ በ30ኛው እና በ79ኛው ደቂቃ እንዲሁም የመከላከያው ዓለምነህ ግርማ በ48ኛው ደቂቃ በራሱ መረብ አስቆጥረዋል።

በዚሁ መሰረት መቐለ 70 እንደርታ የፕሪምየር ሊጉን የደረጃ ሰንጠረዥ 45 ነጥብ በመሰብሰብ በአንደኝነት ሲመራ፤ ፋሲል ከነማ በ37 ነጥብ 2ኛ፣ ሲዳማ ቡና ደግሞ በእኩል 37 ነጥብ በጎል ልዩነት 3ኛ ደረጃን ይዘዋል።

መከላከያ፣ ስሁል ሽረ እና ደደቢት በ18፣ በ16 እና በ10 ነጥቦች የወራጅ ቀጠና ውስጥ ይገኛሉ።

You might also like
Comments
Loading...