Fana: At a Speed of Life!

በአፋር ክልል አዳኣር ወረዳ የተከሰተውን ድንገተኛ የከብቶች በሽታ አይነት ለመለየት እየተሰራ መሆኑ ተገለፀ

አዲስ አበባ፣ ሚያዚያ 8፣ 2011 (ኤፍ.ቢ.ሲ) በአፋር ክልል አዳኣር ወረዳ የተከሰተውን ድንገተኛ የከብቶች በሽታ አይነት ለመለየት እየተሰራ መሆኑን የክልሉ እንሰሳት እርሻና ተፈጥሮ ሀብት ቢሮ ገለፀ።

የወረዳው አስተዳዳሪ አቶ ዳውድ ገአስ በድንገተኛ በሽታው ከ16 በላይ የሚሆኑ ከብቶች መሞታቸውን ገልጸዋል።

በሽታው ወደ ጤናኛ እንሰሳት እንዳይዛመት ለክልል ሪፖርት መደረጉም ነው አስተዳዳሪው ያስታወቁት።

ለክልሉ እንሰሳት፣ እርሻና ተፈጥሮ ሀብት ቢሮ በደረሰው መረጃ መሰረት የበሽታው አይነት ለመለየት የምርመራ ቡድን ወደ ስፍራው መላኩን በቢሮው የእንሰሳት ህክምና ባለሙያና የእንሰሳትና የእፅዋት ጤና አጠባበቅ ዳይሬክቶሬት ተወካይ ዶክተር መሀመድ ኑር ለፋና ብሮድካስቲንግ ኮርፖሬት ተናግረዋል።

አሁን የድርቅ ጊዜ ስለሆነ እንደዚህ አይነት ምልክቶች እንደሚኖሩም ነው ዶክተር መሀመድ ያስታወቁት።

ነዋሪዎችም በተለያዩ ወረዳዎች እንዲህ አይነት ምልክቶች ሲያዩ በአፋጣኝ በአቅራቢያቸው ያሉ የጤና ባለሙያዎች ሊያሳውቁ እንደሚገባ ዶክተር መሀመድ ኑር ገልፀዋል።

የክልሉ እንሰሳት እርሻና ተፈጥሮ ሀብት ቢሮ በሚቀጥለው ሳምንት በክልሉ ባሉ 32 ወረዳዎች ላይ የእንሰሳት ክትባትና ህክምና ዘመቻ ለማድረግ በዝግጅት ላይ እንዳለም አክለው አስታውቀዋል።

ይህ ችግር ከ3 ቀን በፊት መከሰቱ እና የሞቱት እንሰሳት ቁጥር ከዚህ ሊበልጥ እንደሚችል ተገልጿል።

በአሊ ሹምባሕሪ

You might also like
Comments
Loading...