Fana: At a Speed of Life!

በአዶላ ከተማ ከ220 ሺህ በላይ ሀሰተኛ የብር ኖቶች ተያዘ

አዲስ አበባ፣ ሚያዚያ 18፣ 2011 (ኤፍ.ቢ.ሲ) በጉጂ ዞን አዶላ ከተማ ከህጋዊ ገንዘብ ጋር የተቀላቀለ ከ2 መቶ 20ሺህ በላይ ሀሰተኛ የብር ኖቶች መያዙን ፖሊስ አስታወቀ።

የከተማው ፖሊስ አዛዥ ሳጂን ታባ ነጋሳ እንደገለጹት÷ በከተማው ሲዘዋወር የተያዙት እነዚህ ሀሰተኛ የብር ኖቶች ባለመቶ እና ባለ 50 ናቸው።

ሚያዝያ 15ቀን 2011 ዓ.ም ከተያዘው ከዚሁ ሀሰተኛ የብር ኖት ውስጥ ወርቅ ሻጭ ነኝ ከሚል አንድ ግለሰብ 17 ሺ 300 ብር በኢትዮጵያ ንግድ ባንክ ለማስገባት ሲሞክር እንደሆነ ተገልጿል፡፡

በዚሁ እለት ወርቅ ሸጧል የተባለው የሌላው ግለሰብ ቤት ሲፈተሽም ተጨማሪ 110 ሺህ ሀሰተኛ የብር ኖት እጅ ከፍንጅ መያዙን ነው የተገለጸው፡፡

ይሄው ግለሰብ አዋሽ ባንክ በከፈተው የሂሳብ ቁጥር እንዲገባለት ለሌላ ሶስተኛ ሰው ከ4 ሺህ ህጋዊ ብር ጋር የተቀላቀለ 100 ሺህ ሀሰተኛ ባለመቶ ብር ኖት ሰጥቶ መገኘቱ እንደተደረሰበት አዛዡ አስረድተዋል፡፡

ከዚሁ ድርጊት ጋር በተያያዘ ሁለት ግለሰቦች በፖሊስ ተይዘው ምርመራ እየተደረገባቸው እንደሚገኝም ነው የፖሊስ አዛዡ የገለጹት።

በዓሉን ምክንያት በማድረግ የማታለያ ዘዴዎች በመቀያየር ህገ ወጥ ተግባር ለመፈጸም የተዘጋጁና የሚንቀሳቀሱ እንዳሉ በመጠቆም ህብረተሰቡ ጥንቃቄ እንዲያደርግና መሰል ችግሮች ሲያጋጥሙ ጥቆማ ማድረግ ይገባል ብለዋል፡፡

ምንጭ፡- ኢ ዜ አ

You might also like
Comments
Loading...