Fana: At a Speed of Life!

በቦስተን ማራቶን ኢትዮጵያውያን አትሌቶች ድል ቀንቷቸዋል

አዲስ አበባ፣ ሚያዚያ 8፣ 2011 (ኤፍ.ቢ.ሲ) በአሜሪካ በተካሄደው 123ኛው የቦስተን ማራቶን ኢትዮጵያውያን አትሌቶች ድል ቀንቷቸዋል።

በቦስተን ማራቶን በሴቶች የተሳተፈችው ኢትዮጵያዊቷ አትሌት ወርቅነሽ ደገፋ 2 ሰዓት ከ23 ደቂቃ ከ31 ሰከንድ በመግባት ውድድሩን ማሸነፍ ችላለች።

አትሌት ወርቅነሽ ደገፋ ውድድሩን ከተጀመረ ከ5 ኪሎ ሜትር በኋላ ሌሎቹን ተወዳዳሪዎች ቀድማ በመውጣት ብቻዋን እየመራች ማሸነፏም ተነግሯል።

ኬንያዊቷ አትሌት ኤድና ኪፕላጋት 2 ሰዓት ከ24 ደቂቃ ከ13 ሰከንድ በማግባት 2ኛ ደረጃን ይዛ ስታጠናቅቅ፤ አሜሪካዊቷ ጆርዳን ሀሳይ 2 ሰዓት ከ25 ደቂቃ ከ20 ሰከንድ በመግባት ውደድሩን 3ኛ ደረጃ ይዛ ማጠናቀቋ ነው የተነገረው።

በውድድሩ ላይ የተሳተፈችው ሌላኛዋ ኢትዮጵያዊት አትሌት መስከረም አሰፋ 2 ሰዓት ከ25 ደቂቃ ከ40 ሰከንድ በመግባት 4ኛ ደረጃን ይዛ ማጠናቀቅ ችላለች።

በወንዶች በተደረገ ውድድር የማሸነፍ ግምት ተሰጥቶት የነበረውና የቦስተን ማራቶን የሁለት ጊዜ ሻምፒዮኑ ኢትዮጵያዊው አትሌት ሌሊሳ ዴሲሳ በ2 ሰከንድ ብቻ ተቀድሞ ውድድሩን 2ኛ ደረጃ ይዞ ማጠናቀቁ ታውቋል።

በዚሁ መሰረት ውድድሩን ኬንያዊው አትሌት ላውረንስ ቼሮኖ 2 ሰዓት ከ07 ደቂቃ ከ57 ሰከንድ በመግባት1ኛ በመሆን ማጠናቀቅ ችሏል።

ኢትዮጵያዊው አትሌት ሌሊሳ ዴሲሳ 2 ሰዓት ከ07 ደቂቃ ከ59 ሰከንድ በመግባት 2ኛ ደረጃን ሲይዝ፤ ኬንያዊው አትሌት ካኔት ኪፔሞይ 2 ሰዓት ከ08 ደቂቃ ከ07 ሰከንድ በመግባት 3ኛ ደረጃን በመያዝ ማጠናቀቅ ችለዋል።

You might also like
Comments
Loading...