Fana: At a Speed of Life!

በቀጣይ የበልግ ወራት የተሻለ ዝናብ እንደሚኖር ብሄራዊ ሚቲዮሮሎጂ ኤጀንሲ አስታወቀ

አዲስ አበባ፣ ሚያዚያ 11፣ 2011 (ኤፍ.ቢ.ሲ) በቀጣይ ሁለት የበልግ ወራት የተሻለ ዝናብ እንደሚኖር አመላካች የሚቲዮሮሎጂ ሁኔታዎች መኖራቸውን ብሄራዊ ሚቲዮሮሎጂ ኤጀንሲ አስታወቀ፡፡

የኤጀንሲው ዋና ዳይሬክተር አቶ ፈጠነ ተሾመ በዋናነት የበልግ አብቃይ አካባቢ የሚገኙ የህብረተሰብ ክፍሎች በቀጣይ የሚጠበቀውን ዝናብ በአግባቡ መጠቀም እንዳለባቸው አሳስበዋል።

የግብርና ሚኒስትር ዲኤታው አቶ ሳኒ ረዲ በበኩላቸው የኤልኒኖ ክስተት እንደሚታይበት በሚጠበቀው በዚህ የበልግ ወቅት 60 ሚሊየን ኩንታል ምርት ለመሰብሰብ መታቀዱን ተናግረዋል፡፡

ለዚሁ አገልግሎት የሚውሉ የማዳበሪያ፣ ምርጥ ዘር፣ ፀረ አረምና ተባይ ኬሚካሎች ለማቅረብ ቅድመ ዝግጅት መደረጉንም ነው የተናገሩት።

በዚህ አመት 2 ሚሊየን ሄክታር መሬት በበልግ ሰብል ይሸፈናል ተብሎ እንደሚጠበቅ ተነግሯል።

የደቡብና ደቡብ ምስራቅ ኢትዮጵያ ክፍሎች ዋነኛ ተጠቃሚ አካባቢዎች ሲሆኑ በእነዚህ ስፍራዎች የሚዘንበው ዝናብ ከአጠቃላዩ በአማካይ እስከ 70 በመቶ ይደርሳል ተብሏል።

ከየካቲት መጨረሻ እስከ ግንቦት ወር በሚዘልቀው የበልግ ወቅት በቆሎ፣ ማሽላ፣ ቦሎቄና በአንዳንድ አካባቢዎች ደግሞ የበልግ ጤፍ ይመረታል።

በርካታ የኦሮሚያና የደቡብ ክልል አካባቢዎችም ዋነኞቹ በልግ አብቃይ አካባቢዎች ናቸው ።

ድንችን ጨምሮ የተለያዩ አትክልትና ፍራፍሬዎችም በዚህ ወቅት ፍሬ አፍርተው ለፍጆታ ዝግጁ እንደሚሆኑም ነው የተገለጸው።

በስላባት ማናዬ

You might also like
Comments
Loading...