Fana: At a Speed of Life!

በምዕራብ ሸዋ ዞን ባኮ ቲቤ በደረሱ የተሽከርካሪ አደጋዎች የ8 ሰዎች ህይወት አለፈ

አዲስ አበባ፣ ሚያዚያ 8፣ 2011 (ኤፍ.ቢ.ሲ) በምዕራብ ሸዋ ዞን ባኮ ቲቤ ወረዳ በደረሱ ሁለት የተሽከርካሪ አደጋዎች  የስምንት ሰዎች ሕይወት ማለፉን ፖሊስ አስታወቀ።

በአደጋዎቹ በ14  ሰዎች ላይ ከባድና ቀላል የአካል ጉዳት ደርሷል።

የወረዳው ፖሊስ ጽህፈት ቤት ኃላፊ ሳጂን ረቡማ  ጉሉማ እንደገለፁት፥ ትላንት ከቀኑ 10  ሰዓት አካባቢ  17 ሰዎችን አሳፍሮ ከአምቦ ወደ ባኮ ከተማ ይጓዝ የነበረ አነስተኛ የህዝብ ማመላለሻ ተሽከርካሪ የመገልበጥ አደጋ ደርሶበታል።

በአደጋው ም የስድስት ሰዎች ህይወት ወድያው ሲያልፍ በ11 ሰዎች ላይ ከባድና ቀላል የአካል ጉዳት ደርሷል።

አደጋው በወረዳው ሰደን ቂጤ ቀበሌ ጎዳ ቡሩሳ በተባላ አካባቢ መድረሱን የገለፁት ሳጂን ረቡማ፥ አሽከርካሪው ለጊዜው በመጥፋቱ ክትትል እየተደረገበት መሆኑን ተናግረዋል ።

በተመሳሳይ ከአዲስ አበባ ወደ ጊምቢ ከተማ በመጓዝ ላይ የነበረ መለስተኛ የህዝብ ማመላለሻ በወረዳው ሲናኖ ወልቂጤ ቀበሌ ሲደርስ በመገልበጡ አሽከርካሪውን ጨምሮ የሁለት ሰዎች ህይወት ወድያው አልፏል።

በሶስት ሰዎች ላይ ደግሞ  ከባድና ቀላል የአካል ጉዳት መድረሱን ሳጂን ረቡማ ገልጸዋል።

“በአደጋዎቹ ህይወታቸውን ያጡ ሰዎች አስከሬን ለየቤተሰቦቻቸው ተሰጥቷል” ያሉት ሳጂኑ ከባድ የአካል ጉዳት የደረሰባቸው በባኮ ሆስፒታል የህክምና እርዳታ እየተደረገላቸው መሆኑን አስታውቀዋል።

እንደ ሳጅን ረቡማ ገለጻ የአደጋዎቹ መንስኤ እየተጣራ ነው።

ምንጭ፦ ኢዜአ

You might also like
Comments
Loading...