Fana: At a Speed of Life!

በሀሰተኛ ሰነዶች ከ219 ሚሊየን ብር በላይ የሚገመቱ የተለያዩ ቁሳቁሶች ወደ ሀገር ውስጥ ሊገቡ ሲሉ ተያዙ

አዲስ አበባ፣ ሚያዚያ 16፣ 2011 (ኤፍ.ቢ.ሲ) ሀሰተኛ ሰነዶችን በመጠቀም ከ219 ሚሊየን ብር በላይ የሚገመቱ የተለያዩ ቁሳቁሶች በቦሌ ዓለም አቀፍ አውሮፕላን ማረፊያ በኩል ወደ ሀገር ውስጥ ሊገቡ ሲሉ ተያዙ።

የኢትዮጵያ ጉምሩክ ኮሚሽነር አቶ ደበሌ ቃበታ ዛሬ በጉዳዩ ላይ በሰጡት መግለጫ፥ የጀርመን ተራድኦ ድርጅት /ጂ አይ ዜድ/ ያለውን ዓለም አቀፍ የዲፕሎማቲክ መብት በመጠቀም በድርጅቱ ስም እቃዎችን በሀሰተኛ ሰነድ ወደ ሀገር ውስጥ ሊያስገቡ ሲሉ መያዛቸውን ተናግረዋል።

አጠቃላይ ከዚህ ወንጀል ጋር ተያይዞ አምስት ግለሰቦች በቁጥጥር ስር የዋሉ ሲሆን ሶስቱ  ተጠርጣሪዎች የጀርመን ተራድኦ ድርጅት /ጂ አይ ዜድ/  ሰራተኞች ሲሆኑ ሁለቱ ደግሞ ከራይድ ትራይንዚተር መሆናቸው ታውቋል፡፡

ተጠርጣሪዎቹ የውጭ ጉዳይ ሚኒስቴር እና የኢንተርናሽናል ካርጎ አገልግሎት ተቋማት የወጡ ሰነዶችን አስመስሎ የሀሰት ዘነድ በማዘጋጀት ተጠቅመዋል።

ከዚህ ቀደም ጂ አይ ዜድ 410 ኪሎ ግራም እቃን የዲፕሎማቲክ መብትን በመጠቀም ከቀረጥ ነፃ እንዲያስገባ የተሰጠውን ሰነድ መነሻ በማድረግ 4 ሺህ 100 ኪሎ ግራም እቃ ከቀረጥ ነፃ እንዲገባ እንደተፈቀደለት በማስመሰል ወደ ሀገር ውስጥ እቃው መግባቱን ነው ያመለከቱት።

ግምታቸው 52 ነጥብ 3 ሚሊየን ብር የሚሆን 349 ሺህ 84 የተለያዩ የሞባይል ስክሪኖች፣ ግምታቸው 118 ነጥብ 4 ሚሊየን ብር የሚሆን 687 ካነን ካሜራዎች እና 20 ነጥብ 2 ሚሊየን ብር የሚገመቱ 6 ሺህ 734 የተለያዩ የመኪና መለዋወጫዎች ከተያዙት እቃዎች መካከል ይገኛሉ።

በተጨማሪም ፕሮጀክተሮች፣ መድሃኒቶች፣ የብር ጌጣጌጦች እና ልዩ ልዩ ኬብሎች በሀሰተኛ ሰነድ ወደ ሀገር ውስጥ ሊገቡ ሲሉ ከተያዙት መካከል የሚገኙ እቃዎች ናቸው።

በበላይ ተስፋዬ

You might also like
Comments
Loading...