Fana: At a Speed of Life!

ሳምሰንግ በ5G ኔትዎርክ የሚሰራ ስማርት ስልክ ለገበያ ሊያቀርብ ነው

አዲስ አበባ፣ መጋቢት 25፣ 2011 (ኤፍ.ቢ.ሲ) ሳምሰንግ በዓለማችን የመጀመሪያ ነው የተባለለት በ5G ኔትዎርክ የሚሰራ ስማርት ስልክ በቀጣዩ ወር ለገበያ ሊያቀርብ ነው።

ሳምሰንግ በ5G ኔትዎርክ የሚሰራ ስማርት ስልኩን በደቡብ ኮሪያ ውስጥ ለሽያጭ እንደሚያቀርብም ነው የተነገረው።

“ጋላክሲ S10 5G” የተባለው ስማርት ስልኩ 6 ነጥብ 7 ኢንች ስክሪን ስፋት ሲኖረው፤ 8 ጊጋ ባይት ራም እና በ256 እና በ512 ጊጋ ባይት የመረጃ መያዣ አማራጮች ለገበያ የሚቀርብ መሆኑም ታውቋል።

ስማርት ስልኩ በጀርባው ላይ የተለያየ ሜጋ ፒክስል ያላቸው አራት የካሜራ ሌንሶች የተገጠሙለት ሲሆን፥ እነዚህም 12 ሜጋ ፒክስል ቴሌፎቶ ሌንስ፣ 12 ሜጋ ፒክስል ሰፊ ስፍራን የሚያነሳ ሌንስ፣ 16 ሜጋ ፒክስል በጣም ሰፊ እና ከርቀት የሚያነሳ ሌንስ እንዲሁም 3D ምስል ለማንሳት የሚያስችሉ ናቸው።

የፊትለፊት (ሰልፊ) ካሜራውም ሁለት ሌንሶች ያሉት ሲሆን፥ ሌንሶቹም 10 ሜጋ ፒክስል እና 3D ምስል ለማንሳት የሚያስችሉ ናቸው።

ስማርት ስልኩ 4,500mAh ባትሪ ያለው ሲሆን፥ በፍጥነት ሀይል መሙላት የሚችል እና አንድሮይድ 9 ነጥብ 0 ኦፕሬቲንግ ሲስተም እንደሚጠቀምም ታውቋል።

ለስማርት ስልኩ መሸጫም ለባለ 256 ጊጋ ባይት መረጃ መያዣ ስማርት ስልክ 1 ሺህ 231 የአሜሪካ ዶላር፣ ለባለ 512 ጊጋ ባይት የመረጃ መያዣ ደግሞ 1 ሺህ 366 የአሜሪካ ዶላር ተቆጥሮላቸዋል።

ምንጭ፦ fossbytes.com

You might also like
Comments
Loading...