Fana: At a Speed of Life!

ምርት ገበያው በመጋቢት ወር የ3 ነጥብ 6 ቢሊየን ብር ዋጋ ያላቸው ምርቶችን አገበያየ

አዲስ አበባ፣ ሚያዚያ 4፣ 2011 (ኤፍ.ቢ.ሲ) የኢትዮጵያ ምርት ገበያ በመጋቢት ወር  3 ነጥብ 6 ቢሊየን ብር ዋጋ ያላቸውን 84 ሺህ ቶን ምርቶች ማገበያየቱን አስታወቀ፡፡

ምርት ገቢያው ለፋና ብሮድካስቲንግ ኮርፖሬት በላከው መግለጫ የአኩሪ አተር ግብይት እያደገ መምጣቱን አስታውቋል፡፡

በዚህ ወር 21 ሺህ ቶን አኩሪ አተር በ282 ሚሊየን ብር የተገበያየ ሲሆን፥ አማካይ የግብይት ዋጋውም ከየካቲት ወር ጋር ሲነፃጸር በ0 ነጥብ 23 በመቶ ጨምሯል፡፡

ይህም ከአጠቃላይ ግብይቱ 25 በመቶ ድርሻ እንደሚይዝ ነው የተጠቆመው፡፡

በወሩ 30 ሺህ 216 ቶን ቡና፣ 26 ሺህ 390 ቶን ሰሊጥ፣ 21 ሺህ 395 ቶን አኩሪ አተር፣ 6 ሺህ 245 ቶን ነጭ ቦሎቄና 25 ቶን አረንጓዴ ማሾ በ3 ነጥብ 6 ቢሊየን ብር ተገበያይቷል፡፡

በተጨማሪም 18 ሺህ 785 ቶን ያልታጠበ ለውጭ ገበያ የሚቀርብ ቡና በ1 ነጥብ 13 ቢሊየን ብር ተገበያይቷልም ነው ያለው።

ከዚህ ባለፈም 5 ሺህ 518 ቶን ልዩ ቡና በ447 ሚሊየን ብር፣ 1 ሺህ 139 ቶን ያልታጠበ ልዩ ቡና በ128 ነጥብ 2 ሚሊየን ብር እና 4 ሺህ 379 ቶን የታጠበ ልዩ ቡና ደግሞ በ318 ነጥብ 8 ሚሊየን ብር አገበያይቷል።

በተመሳሳይ 26 ሺህ 390 ቶን ሰሊጥ በ1 ነጥብ 3 ቢሊየን ብር ሲገበያይ የሁመራ ሰሊጥ የግብይት መጠኑን 70 ነጥብ 63 በመቶ እንዲሁም የግብይት ዋጋውን 72 ነጥብ 82 በመቶ በመሸፈን ቀዳሚ ነው።

በሌላ በኩል 6 ሺህ 245 ቶን ነጭ ቦሎቄ በ111 ሚሊየን ብር እና 25 ቶን አረንጓዴ ማሾ በ562 ሺህ ብር ግብይታቸው ተፈፅሟል፡፡

You might also like
Comments
Loading...