Fana: At a Speed of Life!

ሚኒስቴሩ የትንሳኤን በዓል ምክንያት በማድረግ እገዛ ለሚያስፈልጋቸው ወገኖች ድጋፍ አደረገ

አዲስ አበባ ፣ ሚያዚያ 11 ፣ 2011 (ኤፍ ቢ ሲ) የሠራተኛና ማህበራዊ ጉዳይ ሚኒስቴር እና የወደቁትን አንሱ የነዳያን መርጃ ማኅበር መጭውን የትንሳኤ በዓል በጋራ አከበሩ።

ሚኒስቴር መስሪያቤቱ ለ“የወደቁትን አንሱ የነዳያን መርጃ ማኅበር” የ100 ሺህ ብር ድጋፍ አድርጓል።

ድጋፉ ሚኒስቴሩ ከ“የወደቁትን አንሱ የነዳያን መርጃ ማኅበር” ጋር በመተባበር ፈረንሳይ ለጋሲዮን በሚገኘው የእንክብካቤ ማዕከል ባከበረው ልዩ የፋሲካ በዓል ፕሮግራም ላይ የተደረገ ነው።

የበዓል ፕሮግራሙ ሁሉም የህብረተሰብ ክፍል ድጋፍ ከሚያስፈልጋቸው ወገኖች ጎን መቆም እንዳለበት ግንዛቤ ለመፍጠር ያለመ መሆኑን ከሚኒስቴሩ ያገኘነው መረጃ ያመላክታል።

የሠራተኛና ማህበራዊ ጉዳይ ሚኒስትር ዲኤታ አቶ ጌታሁን አብዲሳ በሰው ሰራሽና ተፈጥሯዊ ምክንያቶች ለተለያዩ ማህበራዊና ኢኮኖሚያዊ ችግሮች የተጋለጡ ወገኖችን መንግስታዊና ህዝባዊ አቅምን በማቀናጀት ማገዝ ይገባል ብለዋል።

በዚህ ረገድ ማህበሩ እያደረገ ያለውን እንቅስቃሴ አንድቀው፥ ለጉዳት የተዳረጉ የህብረተሰብ ክፍሎች ከገቡበት ችግር ወጥተው ለመደበኛ አኗኗር እንዲበቁና የልማት ተሳታፊ እንዲሆኑ ማድረግ የሁሉም ሀላፊነት መሆኑን ጠቁመዋል።

የማህበሩ የቦርድ ሊቀንበር አቶ አራጋው ሀይሌ በበኩላቸው ማህበሩ ከተመሰረተ ጀምሮ 1 ሺህ 285 ሰዎችን መርዳት መቻሉን ተናግረዋል።

ከዚህ በተጨማሪም ማህበሩ በተቋሙ ውስጥ ከሚያደርገው ድጋፍ ባለፈ ቤት ለቤት የመሰረታዊ አገልግሎቶችን በመስጠት ላይ ይገኛል ነው ያሉት።

ማህበሩ ከአዲስ አበባ ከተማ አስተዳደር በተሰጠው ቦታ የአረጋውያን መጠለያ፣ የአስተዳደር ቢሮ፣ ክሊኒክ እና አጋዥ ክፍሎችን የያዘ የመጦርያ ማዕከል ገንብቶ አገልግሎት እየሰጠ ይገኛል።

ይሁን እንጅ የህክምና መስጫው የግብዓት እና የሰው ኃይል እጥረት ያለበት በመሆኑ የመንግስት ተቋማት እና የተለያዩ ሲቪል ማህበራት እገዛ እንዲያደርጉ ጠይቀዋል።

 

You might also like
Comments
Loading...