Fana: At a Speed of Life!

መሰረታዊ ሸቀጦች በአግባቡ ለህብረተሰቡ ማቅረብ የሚችሉበትን ሁኔታ ለመፍጠር እየተሰራ ነው

አዲስ አበባ፣ ሚያዚያ 11፣ 2011 (ኤፍ.ቢ.ሲ) የአዲስ አበባ ህብረት ስራ ኤጀንሲ መሰረታዊ ሸቀጦች በአግባቡ ለህብረተሰቡ መቅረብ የሚችሉበትን ሁኔታ ለመፍጠር በቅንጅት እየተሰራ መሆኑን አስታቀ፡፡

የአዲስ አበባ ህብረት ስራ ኤጀንሲ የግብይት ዳይሬክተር የሆኑት አቶ ሙሉ ሸዋ በቀለ በመስረታዊ አቅረቦት ሸቀጦች ላይ የሚቀርቡ ቅሬታዎች የሚነሱት በአብዛኛው ከስርጭት ጋር የተያያዘ መሆኑን ለፋና ብሮድካስቲንግ ኮርፖሬት ተናግረዋል፡፡

ከምርቶቹ አቅርቦትና ስርጭት ጋር ተያይዞ የሚያጋጥሙ ችግሮች በመቅረፍ ሸቀጦቹ በአግባቡ ለህብረተሰቡ እንዲደርሱ እየተሰራ መሆኑንም ነው ዳይሬክተሩ የተናገሩት፡፡

መጪው የፋሲካ በዓል ተንተርሶ የሚፈጠረው የፍላጎት መጨመር በሸቀጦች ላይ የዋጋ ንረት እንዳያስከትል ከህብረት ስራ ማህብራትና ከዩኒየኖች ጋር በመተባበር በርካታ የግብርናና የእንስሳት ተዋጽኦ ምርቶችን የሸማችና ማህበራት ሱቆች ለማስገባት ቅድመ ዝግት መጠናቀቁንም አስረድተዋል፡፡

በዚህም ከፊታችን ሰኞ ጀምሮ ህብረተሰቡ መሰረታዊ ሸቀጦችን ጨምሮ ለበዓል አስፈላጊ የሆኑ ምርቶችን በሸማች ማህብራት ሱቆች ማግኘት የሚችል መሆኑ ተገልጿል፡፡

ከ2002 ዓ.ም ጀምሮ ስኳር ዘይትና ዱቄት በመንግስት ድጎማ እየቀረቡ የሚገኝ ሲሆን÷ ደንበኞቹ ከአቅርቦትና ስርጭት ጉዳይ ጋር በተያያዘ የተለያዩ ቅሬታዎች እንደሚቀርቡ ይነገራል፡፡

ቅሬታዎችን ለመፍታት በተሰሩ ስራዎች ከደንበኞቹ የሚነሱ ቅሬታዎችን በሂደት መቀነስ መቻሉን የሸማቾች ማህበራት ሱቅ ሃላፊዎች ይናገራሉ፡፡

ወቅትን ጠብቆ የአቅራቢዎች ምርት አለማቅረብ፣ የምርት አቅርቦት መቆራረጥና ከኮታ በታች ለማህበራቱ መሰጠቱ ተጠቃሚው የሚፈልገውን ያህል ምርት እንዳያገኝ እንቅፋት መሆናቸውንም ጠቁመዋል፡፡

በትእግስት ስለሺ

You might also like
Comments
Loading...