Fana: At a Speed of Life!

14ኛው የአፍሪካ የብስክሌት ሻምፒዮና በባህርዳር ይካሄዳል

አዲስ አበባ፣ የካቲት 23፣ 2011 (ኤፍ.ቢ.ሲ) በኢትዮጵያ ለመጀመሪያ ጊዜ 14ኛው የአፍሪካ ብስክሌት ሻምፒዮና በባህርዳር እንደሚካሄድ ተገለፀ፡፡

የአፍሪካ ብስክሌት ሻምፒዮና ከመጋቢት 5 እስከ 10 2011 ዓ.ም እንደሚካሄድ የኢትዮጵያ ብስክሌት ፊዴሬሽን እና የአማራ ክልል ስፖርት ኮሚሽን አስታውቀዋል፡፡

በዚህ ውድድር ከ32 እስከ 35 የሚደርሱ የአፍሪካ ሀገራት ይሳተፋሉ ተብሎ እንደሚጠበቅ  የኢትዮጵያ ብስክሌት ፊዴሬሽን ምክትል ፕሬዚዳንት አቶ ወርቁ ገዳ ተናግረዋል፡፡

ሻምፒዮና በኢትዮጵያ መካሄዱ ኢትዮጵያውያን ተወዳዳሪዎች በራሳቸው መልክዓ ምድር እንዲወዳደሩ እድል የሚሰጥ እና በሁሉም እድሜ ክልል የሚገኙ ተወዳዳሪዎች እንዲሳተፉ የሚጋብዝ መሆኑን ምክትል ፕሬዚዳንት ገልፀዋል፡፡

ውድድሩን የተሳካ ለማድረግ የባህር ዳር ከተማ ህብረተሰብ የእንግዳ ተቀባይነት ባህሉን በማንፀባረቅ ለሚመጡ እንግዶች አስፈላጊውን አገልግሎት እንዲያገኙ በማድረግ ሀላፊነቱን እንዲወጣ ጥሪ ቀርቧል፡፡

እንዲሁም  ውድድር የሚካሄድባቸው ቦታዎች ሙሉ በሙሉ ዝግ በመሆናቸው ህብረተሰቡ አማራጭ መንገዶችን እንዲጠቀም ምክትል ፕሬዚዳንቱ መልክታቸውን አስተላልፈዋል፡፡

የአማራ ክልል ስፖርት ኮሚሽን ኮምሽነር አቶ ባዘዘው ጫኔ በበኩላቸው ክልሉ ይህን ውድድር እንዲያዘጋጅ በተሰጠው እድል ደስተኛ መሆናቸውን ገልፀው ይህም ለክልሉ ማህበራዊና ኢኮኖሚያዊ ፋይዳው የጎላ ነው ብለዋል፡፡

ለውድድሩ 3 ሚሊየን ብር ወጪ መደረጉ የተነገረ ሲሆን ስኬታማ ውድድር በማድረግ የተሻለ ገቢ ይገኛል ተብሎ ይጠበቃል፡፡

 

በናትናኤል ጥጋቡ

You might also like
Comments
Loading...