Fana: At a Speed of Life!

ፕሬዚዳንት ትራምፕ ሁሉም ቦይንግ 737 ማክስ አውሮፕላኖች ከበረራ አገልግሎት እንዲወጡ አዘዙ

አዲስ አበባ፣ መጋቢት 5፣ 2011 (ኤፍ.ቢ.ሲ) የአሜሪካው ፕሬዚዳንት ዶናልድ ትራምፕ ሁሉም ቦይንግ 737 ማክስ የተሰኙ አውሮፕላኖች ከበረራ አገልግሎት እንዲወጡ አስቸኳይ ትእዛዝ ማሳለፋቸው ተነግሯል።

ባሳለፍነው እሁድ ንብረትነቱ የኢትዮጵያ አየር መንገድ የሆነ ቦይንግ 737-8 ማክስ አውሮፕላን ላይ በደረሰ የመከስከስ አደጋ የ157 ሰዎች ህይወት ማለፉን ተከትሎ በአውሮፕላኑ ላይ እየተነሱ ባሉ የደህንነት ስጋቶች ምክንያት ነው ፕሬዚዳንቱ ውሳኔውን ያሳለፉት ተብሏል።

በዚህም መሰረት ፕሬዚደንት ትራምፕ ሁሉም የቦይንግ 737 ማክስ 8 እና ማክስ 9 አውሮፕላኖች ከበረራ በአስቸኳይ እንዲታገዱ ትእዛዝ አስተላልፈዋል።

ፕሬዚዳንት ትራምፕ፥ ሁሉም ቦይንግ 737 ማክስ አውሮፕላኖች ከበረራ አገልግሎት እንዲወጡ ያደረገውነው ለአሜሪካ ህዝብ እና ለሌሎች ህዝቦች ደህንነት ሲባል ነው ብለዋል።

ከዚህ ውሳኔ ላይ መድረሳቸውም በስነ ልቦናም ይሁን በሌሎች በርካታ መንገዶች ያለው ጠቀሜታ ከፍተኛ መሆኑንም ነው ፕሬዚዳንት ትራምፕ የገለፁት።

ፕሬዝዳንት ትራንፕ አክለውም፥ ሁሉም የአሜሪካ አየር መንገዶችና የአውሮፕላን አብራሪዎች የእገዳው መልእክት እንደደረሳቸው እና አውሮፕላኖቹ በደረሱበት ቦታ እንዲቆሙ ትእዛዝ መተላለፉን አስታውቀዋል።

በዚህም መሰረት የአሜሪካ የፌደራል አቩዬሽን አስተዳደር ቦይንግ 737 ማክስ የተሰኙ አውሮፕላኖች ላልተወሰነ ጊዜ በአሜሪካ አየር መንገዶች ጥቅም ላይ እንዳይውል እና አውሮፕላኑ በአመኔሪካ የአየር ክልል ውስጥ እንዳይበር ትእዛዝ አሳልፏል።

የኢትዮጵያ አየር መንገድ ከተከሰከሰበት ስፍራ እና ከሳታላይት ላይ የተገኙ አዳዲስ ማስረጃዎች ላይ በመመስረት ከዚህ ውሳኔ ላይ መደረሱንም የአቪዬሽን አስተዳደሩ አስታውቋል።

የአሜሪካ የፌደራል አቩዬሽን አስተዳደር አውሮፕላኖቹ ከበረራ አገልግሎት እንዲወጡ ውሳኔ ማሳለፉም የአሜሪካ አየር መንገድ ሰራተኞችን አስደስቷል።

የአሜሪካ የትራንስፖርት ሰራተኞች ማህበር ፕሬዚዳንት ጆን ሳሙየልሰን እንደተናገሩት፥ ቦይንግ 737 ማክስ አውሮፕላኖች ከበረራ እንዲወጡ መወሰኑ በአውሮፕላን ለሚጓዙትም ሆነ ለአቪዬሽን ሰራተኞች መልካም ዜና ነው ብለዋል።

ባሳለፍነው እሁድ በኢትዮጵያ አየር መንገድ ላይ የደረሰውን አደጋ ተከትሎ በርከት ያሉ አየር መንገዶች ቦይንግ 737-8 ማክስ አውሮፕላኖች መጠቀም ማቆማቸውን በመግለፅ ላይገኛሉ።

በዚህም መሰረት ኢትዮጵያ እና ቻይና በቀዳሚነት አውሮፕላኖቹን ማቆማቸውን የገለፁ ሲሆን፥ ብሪታኒያና፣ ፈረንሳይ፣ ጀርመንና አውስትራሊያ፣ ህንድ፣ የአውሮፓ ህብረት፣ ብራዚል፣ ኖርዌይ፣ ኢንዶኔዢያ እና ማሌዢያ አውሮፕላኑን ከለከሉት ሀገራት ውስጥ ተጠቃሽ ናቸው።

ሀገራቱ ቦይንግ 737 ማክስ አውሮፕላኖች ከበረራ አገልግሎት እንዲወጡ መወሰናቸውን ተከትሎም ኩባንያው አጣብቂኝ ውስጥ ገብቷል ነው የተባለው።

ምንጭ፦ www.aljazeera.com

You might also like
Comments
Loading...