Fana: At a Speed of Life!

በኳታር ጉብኝት በማድረግ ላይ ያሉት ጠ/ሚ ዶክተር አብይ ከሀገሪቱ ኤሚር ጋር ተወያዩ

 

አዲስ አበባ ፣ መጋቢት 10 ፣ 2011 (ኤፍ ቢ ሲ) በኳታር ጉብኝት በማድረግ ላይ የሚገኙት የኢፌዴሪ ጠቅላይ ሚኒስትር ዶክተር አብይ አህመድ ከሀገሪቱ ኤሚር ሼክ ታሚም ቢን ሃማድ አል ታኒ ጋር በዶሃ ተወያዩ።

መሪዎቹ በውይይታቸውም በሁለትዮሽ ጉዳዮች ላይ በጥልቀት ተወያይተዋል።

በተለይም በኢንቨስትመንት፣ ቱሪዝም እና መሰረተ ልማት ዘርፎች ላይ ያላቸውን ትብብር እና ግንኙነት በበለጠ ማጠናከር በሚችሉበት ሁኔታ ላይ መክረዋል።

በተጨማሪም ቀጠናዊ እና ዓለም አቀፋዊ ጉዳዮች ላይ ሀሳብ ተለዋውጠዋል።

ኤሚሩ በጠቅላይ ሚኒስትር ዶክተር አብይ አህመድ ለተመራው ልዑክም የምሳ ግብዣ ስነ ስረዓት አከናውነዋል።

የኢትዮ ኳታር ግንኙነት እየተሻሻለ ሲሆን፥ የጠቅላይ ሚኒስትሩ ጉብኝትም የሃገራቱን ግንኙነት ወደተሻለ የትብብር ምዕራፍ እንደሚያሸጋግረው ታምኖበታል።

ጠቅላይ ሚኒስትር ዶክተር አብይ ወደ ስልጣን ከመጡ ወዲህ የመጀመሪያቸው የሆነው የኳታር ጉብኝት፥ ለሃገራቱ ግንኙነት መሻሻል ካለው ፋይዳ አንጻር ትልቅ ቦታ የሚሰጠው መሆኑም ተገልጿል።

የኳታሩ ኤሚር በኢትዮጵያ ከሁለት አመት በፊት ጉብኝት ያደረጉ ሲሆን፥ የየሃገራቱ ከፍተኛ ባለስልጣናትም በተለያየ ጊዜ የሁለትዮሽ ግንኙነቱን ለማጠናከር የሚያግዙ ጉብኝቶችን አካሂደዋል።

ከባለስልጣናቱ ጉብኝት ባለፈም ሃገራቱ በተለያዩ መስኮች በጋራ መስራት የሚያስችሉ የመግባቢያ ስምምነቶችን ፈጽመዋል።

ኢትዮጵያም በተለያዩ የኢንቨስትመንት ዘርፎች የተሰማሩ የኳታር ባለሃብቶች መዋዕለ ንዋያቸውን እንዲያፈሱ ፍላጎት እንዳላት በተደጋጋሚ ስትገልጽ ቆይታለች።

ከዚህ ጋር ተያይዞም ባለፈው ጥር ወር በዶሃ በኢትዮጵያ ያሉ ምቹ የኢንቨስትመንት አማራጮችን ለማሳየት ያለመ የኢትዮጵያ ኢንቨስትመንት ፎረም ተካሂዶ ነበር።

ፎረሙ በተያዘው የፈረንጆቹ አመት በተለያየ ጊዜ ቀጥሎ የሚካሄድ ሲሆን፥ ይህም የሃገራቱን የንግድና ኢንቨስትመንት ግንኙነት ለማጠናከርና ለማሳደግ ያስችላል ተብሏል።

You might also like
Comments
Loading...