Fana: At a Speed of Life!

የፓለቲካ ፓርቲዎች የጋራ አሰራር የቃል ኪዳን ስነድ ፈረሙ

አዲስ አበባ፣ መጋቢት 5፣ 2011 (ኤፍ.ቢ.ሲ) የፓለቲካ ፓርቲዎች የጋራ አሰራር የቃል ኪዳን ሰነድን ፈረሙ።

በሰነዱ ላይ 107 የፓለቲካ ፓርቲዎችም ፈርመዋል።

በፊርማ ስነ ስርዓቱ ላይም የኢህአዴግ ሊቀ መንበርና የኢፌዴሪ ጠቅላይ ሚንስትር ዶክተር አቢይ አህመድ ኢህአዴግን በመወከል ፊርማቸውን አኑረዋል።

ፓርቲዎቹ ለረዥም ጊዜ በሰነዱ ላይ ሲወያይ እና ሲደራደሩ ቆይተዋል።

የጋራ አሰራር የቃል ኪዳን ስነዱን የፈረሙ የፖለቲካ ፓርቲዎች ተወካዮችም በመድረኩ ላይ በመገኘት ስለ ሰነዱ አስተያየታቸውን ሰጥተዋል።

የኦብነግ ተወካይ ባስተላለፉት መልእክት ሰነዱን በመፈረማቸው ደስተኛ መሆናቸውን ገልፀው፤ የሰነዱ መፈረም የዴሞክራሲ ስርዓትን ለማስፈን የሚሰራውን ስራ ያግዛል ብለዋል።

ተወካዩ አክለውም በአሁኑ ወቅት በሀገሪቱ የተጀመሩ የሪፎርም ስራዎች ተጠናክሮ እንዲቀጠል የሁሉንም የፖለቲካ ፓርቲዎች ተሳትፎ ይጠይቃልም ብለዋል።

የአርበኞች ግንቦት 7 ሊቀመንበር ፕሮፌሰር ብርሃኑ ነጋ በበኩላቸው፥ ሰነዱን ከማዘጋጀት ጀምሮ የተለያዩ ፀባይ ያላቸው ከ100 በላይ አንድ ላይ በመሰብሰብ በትእግስት ለዚህ ላበቁ አካላት እንዲሁም ተሳታፊ ለነበሩ ፓርቲዎች በሙሉ ምስጋና ይገባል ብለዋል።

የፓለቲካ ፓርቲዎች የጋራ አሰራር የቃል ኪዳን ስነድ የተዘጋጀው በህግ መንግስት አስገዳጅነት አሊያም በህግ አስገዳጅነት ሳይሆን በሁሉም የፖለቲካ ፓርቲዎች ፍላጎት ላይ ተመስርቶ የተዘጋጀ ነው ሲሉም ተናግረዋል።

በዛሬው እለት የተፈረመው ሰነድ የፖለቲካ ልዩነቶችን የሚቀበል እና በፈቃደኝነት ላይ በመመስረት የተፈረመ በመሆኑ የሰላም ሰነድ ነው ብለዋል።

አርበኞች ግንቦት 7 አንድነት እና ለዴሞክራሲ የፓለቲካ ፓርቲዎች የጋራ አሰራር የቃል ኪዳን ስነድን ተቀብሎ አክብሮ እንደሚንቀሳቀስም አረጋግጠዋል።

የአረና ሊቀመንበር አቶ አብረሃ ደስታም፥ አረና የቃል ኪዳን ሰነዱን ሲፈርም ደስታ ይሰማዋል በማለት፥ ፓርቲያቸው ሰነዱን አክብሮ እንደሚንቀሳቀስ አስታውቀዋል።

የቃል ኪዳን ሰነዱ እርስ በእርስ ለመቀራረብ፣ ህዝብን ለህዝብ ለማቀራረብ፣ የህዝብን ህልውና ለመጠበቅ፣ የሀገር አንድነትን ለመገንባትና ለዴሞክራሲ ስርዓት ግንባታው ያለው አስተዋጽኦ ከፍተኛ መሆኑንም ጠቅሰዋል።

የአማራ ብሄራዊ ንቅናቄ (አብን) ተወካይ በበኩላቸው፥ በዛሬው እለት የተፈረመው የፓለቲካ ፓርቲዎች የጋራ አሰራር የቃል ኪዳን ስነድ ታሪካዊና የትውልድን አደራ የመወጣት አካል ነው ብለዋል።
አብን ለሰነዱ ተፈፃሚነት እንደሚሰራም አስታውቀዋል።

የኦሮሞ ነፃነት ግንባር (ኦነግ) ተወካይ፥ ከዚህ ቀደም በርካታ ስምምነቶች ተደርገዋል፤ የአሁኑ ግን ካለንበት ጊዜ አኳያ ልዩ ነው ብለዋል።

ሰነዱ የፖለቲካ ፓርቲዎች በመካከላቸው ያለውን ልዩነት በሰለጠነ መንገድ የሚፈቱበት እና ለሁሉም ፓርቲዎች ነፃነት የሚሰጥ ነው ሲሉም ተናግረዋል።

ኦነግ ለቃል ኪዳን ሰነዱ ተፈፃሚነት በቁርጠኝነት ይሰራል ያሉት ተወካዩ፥ መንግስትም ሰነዱን እንደሚያከብር እምነት እንዳላቸው ገልፀዋል።

የመድረክ ተወካይ ፕሮፌሰር በየነ ጴጥሮስ፥ መድረክ ከዚህ በፊት ስምምነቶችን አልፈርምም ሲል ነበር፤ የአሁኑ ግን ክፍተቶች ቢኖሩትም የተሻለ በመሆኑ ፈርመናል ብለዋል።

የፓለቲካ ፓርቲዎች የጋራ አሰራር የቃል ኪዳን ስነድ ከፖለቲካ ፓርቲዎች አቅም አለመመጣጠን እና ከሚዲያ አጠቃቀም ጋር ክፍተቶች አሉን ይህ በህግ አግባብ እንዲስተካከል እንሰራበታለን ሲሉም ተናግረዋል።

የፓለቲካ ፓርቲዎች የጋራ አሰራር የቃል ኪዳን ስነድ ተግባራዊነት መድረክ እና ሌሎች አጋር ድርጅቶቹ እንደሚሰሩ ቃል እገባለሁ ብለዋል።

You might also like
Comments
Loading...