Fana: At a Speed of Life!

የፓለቲካ ፓርቲዎች የጋራ አሰራር የቃል ኪዳን ስነድ የሁሉም ትግል ውጤት ነው- ጠቅላይ ሚኒስትር ዶ/ር አብይ

አዲስ አበባ፣ መጋቢት 5፣ 2011 (ኤፍ.ቢ.ሲ) የፓለቲካ ፓርቲዎች የጋራ አሰራር የቃል ኪዳን ስነድ የሁሉም የትግል ውጤት መሆኑን ጠቅላይ ሚኒስትር ዶክተር አብይ አህመድ አስታወቁ።

የፓለቲካ ፓርቲዎች የጋራ አሰራር የቃል ኪዳን ሰነድ የፊርማ ስነ ስርዓት በዛሬው እለት የተካሄደ ሲሆን፥ በፊርማ ስነ ስርዓቱ ላይም የኢህአዴግ ሊቀ መንበርና የኢፌዴሪ ጠቅላይ ሚንስትር ዶክተር አቢይ አህመድ ኢህአዴግን በመወከል ፊርማቸውን አኑረዋል።

ጠቅላይ ሚኒስትር ዶክተር አብይ አህመድ በመድረኩ ላይ ባስተላለፉት መልእከት፥ ዛሬ ለኢትዮጵያ ዴሞክራሲ ጅማሮ በአይነቱ  ልዩ እና በታሪኳ አዲስ ለሆነ እለት እንኳን አደረሳችሁ ብለዋል።

ከዚህ በፊት የፖለቲካ ፓርቲዎች የተለያዩ ስምምነቶችን ፈርመው ነበር፥ ሆኖም ግን ሁሉንም ያሳተፈ አልነበረም ያሉት ጠቅላይ ሚኒስትር ዶክተር አብይ፥ የዛሬው ስምምነት ግን ከ100 በላይ የሚሆኑ ሁሉንም የፖለቲካ ፓርቲዎች ያሳተፈ ሲሉም ተናግረዋል።

ጠቅላይ ሚኒስትር ዶክተር አብይ አህመድ አክለውም፥ ዛሬ በርካታ የአፍሪካ ሀገራት በኢትዮጵያ ያለውን የለውጥ ሁኔታ ይመኛሉ፤ ልምድ ለመቅሰምም ይጠይቃሉ ብለዋል።

ለዚህ ለውጥ የታገሉ እና የታሰሩ አካላት ግን ለውጡን ሲያጥላሉ ይስተዋላሉ ሲሉም ተናግረዋል።

የፖለቲካ አመራሮች ነገ የሚመሩት ህዝብን ስለሆነ መንግስት መሆን የሚፈልጉ ድርጅቶች ከዚህ ቀደም የነበረውን ከመውቀስ ይልቅ ለቀጣይ በትእግስት ከሁሉም ጋር ቢሰሩ መልካም ነው ሲሉም መልእክት አስተላልፈዋል።

በአሁኑ ወቅት የተጀመሩ የለውጥ ስራዎች አሉ ያሉት ጠቅላይ ሚኒስትሩ፥ ይህንን በማበረታታት ቀሪ ስራዎችን በመደጋገፍ እና በመተጋገዝ እያስተካከልን ብንሄድ መልካም ነው ብለዋል።

የተሰራውን በመሉ ከመተቸት እና ከመንቀፍ ይልቅ ሊስተካከል ይገባል የሚሉትን በሙሉ ጊዜ ካገኙ ቁጭ ብለው በፅሁፍ እና በውይይት እንዲሰራበት ቢያደርጉ መልካም ነው ሲሉም ገልፀዋል።

ህግ መንግስት ሊስተካከል ይገባል በሚል ለቀረበው ሀሳብም የኢትዮጵያ ህገ መንግስት የሁሉም ኢትዮጵያውያን አንጂ የአንድ ክልል ብቻ አይደለም፤ ስለዚህ ሁሉም በተወካዮቹ በኩል እንዲሰራበት ይደረጋል፤ ከዚያ ሲያልፍ ደግሞ ህዝቡ እንዲሳተፍበት በማድረግ አብዛኛው ህዝብ በፈቀደው ይሆናል ብለዋል።

መንግስት ለፖለቲካ ፓርቲዎች የሚያደርገውን ድጋፍ በተመለከተም መንግስት ለ100 ፓርቲዎች ድጋፍ ማድረግ ይቸግረዋል፤ አንድ ላይ ሰብሰብ ካሉ ግን አሁንም አስፈላጊውን ድጋፍ ለማድረግ ዝግጁ ነው ብለዋል።

መገናኛ ብዙሃንም የኢህአዴግን እንደሚያስተላልፉት ሁሉ የሁሉንም የፖለቲካ ፓርቲዎች መልእክት እንዲያስተናግዱ ጥሪ አቅርበዋል።

You might also like
Comments
Loading...