Fana: At a Speed of Life!

የኢትዮጵያ ዓየር መንገድ እንደቀደመው ጊዜ ሁሉ የበረራ ቁጥሩና የጊዜ ሰሌዳ ሳይዛባ ወደመላው ዓለም መብረሩን ቀጥሏል- ዋና ስራ አስፈፃሚው

አዲስ አበባ፣ መጋቢት 3፣ 2011 (ኤፍ.ቢ.ሲ) የኢትዮጵያ ዓየር መንገድ እንደከዚህ ቀደሙ ሁሉ የበረራ ቁጥሩም ሆነ የጊዜ ሰሌዳው ሳይዛነፍ በመላው ዓለም መብረር መቀጠሉን የዓየር መንገዱ ዋና ስራ አስፈፃሚ አቶ ተወልደ ገብረማርያም ገለፁ።

ዋና ስራ አስፈጻሚው ማምሸውን በቦሌ ዓለም አቀፍ አውሮፕላን ማረፊያ በመገኘት የበረራ ሂደቱን ተመልክተዋል።

ከዚያም በኋላ በሰጡት መግለጫ ዓየር መንገዱ በበረራ ብዛትም ሆነ የጊዜ ሰሌዳ መደበኛ ስራው ሳይዛነፍ ቀጥሏል።

ዛሬ ብቻም 300 በረራዎች እንደወትሮው መደረጋቸውንና ምሽቱንም 30 በረራዎች እንዳሉ ነው ያመለከቱት።

መንገደኞችም በዓየር መንገዱ ላይ ያላቸው እምነት መቀጠሉንም ተናግረዋል።

ከእሁዱ የአውሮፕላን አደጋ በኋላም ምንም ዓይነት የተሰረዘም ሆነ የተራዘመ በረራ አለመኖሩን አረጋግጠዋል።

የዓየር መንገዱ አብራሪዎች ከኢንዶኔዥያው የአውሮፕላን አደጋ በኋላ ከቦይንግ ኩባንያ በመጣ ምክረ ሃሳብ መሰረት በቦይንግ 737 ማክስ 8 ላይ በምስለ በረራ የተደገፈ በቂ ስልጠና መውሰዳቸውን ነው ያነሱት።

የእሁዱን አደጋ በተመለከተ የሚከናወነው ምርመራ ረዥም ጊዜ ሊወስድ እንደሚችል በመጠቆም፥ ነገር ግን አሁን ላይ መረጃ እና ማስረጃ የመሰብሰብ ስራ በመከናወን ላይ እንደሚገኝ አቶ ተወልደ ተናግረዋል።

የኢትዮጵያ ዓየር መንገድ እና ቦይንግ ኩባንያ ለአደጋው መሪማሪ አካል አስፈላጊውን መረጃ እንደሚሰጡም አስታውቀዋል።

ዓየር መንገዱ ቦይንግ 737 ማክስ አውሮፕላንን ከበረራ ማስወጣቱን በማስታወስም፥ ይህንን እርምጃ የበርካታ ሀገራት ዓየር መንገዶች መከተላቸው በአውሮፕላኑ ላይ ያለውን ጥርጣሬ እንደሚያሳይም ነው ያመለከቱት።

ፋና ብሮድካስቲንግ ኮርፖሬት ያነጋገራቸው የኢትዮጵያ ዓየር መንገድ ተሳፋሪ የሆኑ የውጭ ሀገራት ዜጎች በደረሰው አደጋ ማዘናቸውን ገልፀዋል

ሆኖም ዓየር መንገዱ የደህንነት ታሪኩ አስተማማኝ በመሆኑ ሁሌም መጠቀማቸውን እንደሚቀጥሉ ነው የተናገሩት።

አደጋውን ተከትሎ የዓየር መንገዱ ጥንቃቄ የበለጠ እንደሚጠብቅ በመግለጽም ዕምነታቸው የዚያኑ ያህል ዕየጠነከረ እንደሚሄድ  አስታውቀዋል።

 

በባሃሩ ይድነቃቸው

You might also like
Comments
Loading...