Fana: At a Speed of Life!

የኢትዮጵያ አትሌቲክስ ፌዴሬሽን የአለም አቀፉ የአትሌቲክስ ፌዴሬሽኖች ማህበር ውሳኔን ተቃወመ

አዲስ አበባ፣ መጋቢት 5፣ 2011 (ኤፍ.ቢ.ሲ) የኢትዮጵያ አትሌቲክስ ፌዴሬሽን የአለም አቀፉ የአትሌቲክስ ፌዴሬሽኖች ማህበር ውሳኔን እንደሚቃወም አስታወቀ።

የፌዴሬሽኑ ሥራ አስፈፃሚ ኮሚቴ በዛሬው እለት ባደረገው አስቸኳይ ስብሰባው የአለም አቀፉ የአትሌቲክስ ፌዴሬሽኖች ማህበር ከ2020 የቶክዮ ኦሎምፒክ ጀምሮ የ5000 ሜትር ሩጫ ውድድር ከዳይመንድ ሊግ መሰረዙን እንደሚቃወም ገልጿል።

ተቃውሞውንም ለአለም አቀፉ የአትሌቲክስ ፌዴሬሽኖች ማህበር ፕሬዚዳንት፣ ለአፍሪካ አትሌቲክስ ኮንፌዴሬሽን እና ለምሥራቅ አፍሪካ አትሌቲክስ ሪጅን በደብዳቤ አስገብቷል።

የፌዴሬሽኑ ሥራ አስፈፃሚ ኮሚቴ በላከው ደብዳቤ፥ የአትሌቲክስ ፌዴሬሽኖች ማህበር ካውንስል ያሳለፈው ውሳኔ አስደንጋጭ እና የአባል ሀገራቱን ሀሳብ ያላካተተ ነው ብሏል።

ከዚህ ቀደምም የ10 ሺህ ሜትር የሩጫ ውድድርን ከዳይመንድ ሊግ ማስወጣቱን ያስታወሰው ፌዴሬሽኑ፥ አሁን ደግሞ 5000 ሜትርንም ከውድድር መሰረዙ እንደእኛ ላሉ በረጅም ርቀት ለሚታወቁ ሀገራት ፍትሃዊነት የጎደለው ውሳኔ ነው ብሏል።

የረጅም ርቀት የሩጫ ውድድር ስፖርቶች የእኛ መለያ እና የባህል ስፖርታችን እንደሆነ ነው የሚታወቀው ያለው ፌዴሬሽኑ፥ እነዚህን ውድድሮች በዳይመንድ ሊግ ላይ ማጣት ማለት ለአትሌቲክሳችን ከፍተኛ መሰናክል ይሆናል ሲልም አስታውቋል።

በተለይም የአለም አቀፉ የአትሌቲክስ ፌዴሬሽኖች ማህበር ለሚያዘጋጃቸው ቻምፒየንስሺፕ እና የኦሎምፒክ ውድድሮች ላይ ለሚኒማ ማሟያ ውድድሮችን ማግኘትን አዳጋች እንደሚያደርገውም ገልጿል።

ከዚህ በተጨማሪም ውሳኔው በአትሌቲክስ ስፖርት እድገት ላይም ከፍተኛ አደጋን ይዞ የመጣ ነው ብሏን ፌዴሬሽኑ።

በውሳኔው ሙሉ በሙሉ እንደማይስማማ ያስታወቀው የኢትዮጵያ አትሌቲክስ ፌዴሬሽን፥ ስለዚህም የአለም አቀፉ የአትሌቲክስ ፌዴሬሽኖች ማህበር ውሳኔውን በድጋሚ እንደሚለከትም ጥሪውን አቅርቧል።

You might also like
Comments
Loading...