Fana: At a Speed of Life!

የቆሼ ረጲ ቆሻሻ ማስወገጃ ፕሮጀክት ተመረቀ

አዲስ አበባ፣ መጋቢት 5፣ 2011 (ኤፍ.ቢ.ሲ) በጃፓን መንግስት እርዳታ የተሰራው የቆሼ ረጲ ቆሻሻ ማስወገጃ ፕሮጀክት ተመረቀ ።

ጃፓን በተባበሩት መንግስታት ድርጅት የአካባቢ ልማት በኩል ያሰራችው የቆሼ ረጲ ቆሻሻ ማስወገጃ ፕሮጀክት በዛሬው ዕለት ተመርቋል።

ከሁለት ሚሊዮን የአሜሪካን ዶላር በላይ የፈጀው ይህ ፕሮጀክት የጃፓንን ፉኮካ የደረቅ ቆሻሻ ማስወገድ ዘዴ ላይ ተመስርቶ የተሰራ ሲሆን፥ በነዋሪዎች ላይ ይደርስ የነበረው የቆሻሻ መንሸራተት ሙሉ በሙሉ የሚያስቀር ነው ተብሏል።

በምረቃ ስነ ስርዓቱም በኢትዮጵያ የጃፓን አምባሳደር ዳይሱኬ ማትሱጋና፣ የአዲስ አበባ ከተማ ምክትል ከንቲባ ዶክተር ሰለሞን ኪዳኔ እና የተመድ አካባቢ ልማት ተወካይ ክቡር ናይሰን ሙቲዝዋ ማንጊዛ ተገኝተዋል።

በምረቃ ፕሮግራም ላይ ንግግር ያደረጉት አምባሳደር ማትሱጋና መጋቢት 2 ቀን 2009 ዓ.ም በደረሰው የቆሼ መደርምስ አደጋ ከ200 በላይ ህይወት ማለፉን አስታውሰው በአደጋ ለተጎዱት በድጋሚ መጽናናትን ተመኝተዋል::

የአዲስ አበባ ከተማ አስተዳደር ለጃፓን ኤምባሲ ባደረገው ጥሪ መሰረት፥ የጃፓን መንግስት ከተመድ አካባቢ ልማት ጋር በመተባበር ዘላቂ እና አስተማማኝ በፉኮካ የ ደረቅ ቆሻሻ ማስወገድ ዘዴ ላይ የተመሰረተ ፕሮጀክት ቀርጾ ለምርቃት ማብቃቱ ነው የተገለፀው።

ይህ የፉኮካ የደረቅ ቆሻሻ ማስወገጃ ዘዴ በመሬት ላይ የተቀበሩ ቱቦዎችን በመጠቀም መሬት ውስጥ የተከማቸውን የሜቴን ጋዝ እንዲወጣ በማድረግ የቆሻሻ ክምችቱ እንዳይናድ እና አደጋ እንዳይደርስ የሚያደርግ ዘዴ ነው ተብሏል።

በአሁኑ ወቅትም ከ14 አለም አቀፍ ሃገራት በላይ ይህንን ዘዴ በስራ ላይ ያዋሉ ሲሆን፥ ከ100 ሀገራት የተወጣጡ ባለሙያዎችም ስልጠና ወስደውበታል ነው የተባለው።

በናይሮቢ በተካሄደው ስድስተኛው የቶኪዮ አለም አቀፍ የአፍሪካ ልማት ኮንፈረንስ ላይም ጥራት ያለው ቆሻሻ አወጋገድ ቅድሚያ የተሰጠው ጉዳይ መሆኑ ይታወሳል።

በዚህም መሰረት ጃፓን በደረቅ ቆሻሻ ማስወገድ ስራ ላይ ፉኮካ ዘዴን ተግባራዊ በማድረግ በ2012 ዓ.ም በአዲስ አበባ እና ባህር ዳር ከተሞች ላይም የቆሻሻ ማስወገጃ ፕሮጀክቱን ለመገንባት የምታደርገውን እርዳታ አጠናክራ የምትቀጥል መሆኑን በኢትዮጵያ ጃፓን ኤምባሲ ያገኘነው መረጃ ያመላክታል።

You might also like
Comments
Loading...