Fana: At a Speed of Life!

ወፍራም ፖሊሶች በድጋሚ ወደ ስልጠና ማዕከል እንዲገቡ ያደረገችው ሀገር

አዲስ አበባ፣መጋቢት 6፣2011 (ኤፍ.ቢ.ሲ) ታይላንድ በመላ ሀገሪቱ የሚገኙ ከመጠን በላይ ወፍራም ፖሊሶች በድጋሚ ስልጠና እንዲወስዱ እያደረገች መሆኑ ተነግሯል።

ፖሊስ የተጣለበትን ሃለፊነት በተገቢ ሁኔታ ለመወጣት ያስችለው ዘንድ የተስተካከለ የሰውነት አቋምና ጥንካሬ ሊኖረው እንደሚገባ ብዙዎችን ያሰማማል።

በታይላንድ ወፍራም ፖሊሶች በዕለት ተዕለት የሚያጋጥሟቸውን የተለያዩ የወንጀል ድርጊቶች በተቀላጠፈ ሁኔታ ለመቆጣጠር ሲቸገሩ ማየት የተለመደ ክስተት መሆኑ በዘገባው ተመላክቷል።

ይህን ተከትሎም ታይላንድ በመላ ሀገሪቱ የሚገኙ ከመጠን በላይ  ወፍራም ፖሊሶችና ኦፊሰሮች  የአካልብቃት ስልጠና እንዲወስዱ በድጋሚ ወደ ካምፕ እንዲገቡ ማድረጓ ተነግሯል።

ለዚህም “ቦርጭ የማጥፋት ዘመቻ” በሚል መሪ ቃል በመላ ሀገሪቱ ተግባራዊ እየተደረገ መሆኑ ነው የተገለፀው።

የቦርጭ ማጥፋት ዘመቻው የሚከናወነውም  በሀገሪቱ  ፓክ ቾንግ ከተማ ውስጥ በሚገኘው የፖሊስ ማሰልጠኛ ማዕከል ዋና መስሪያ ቤት ውስጥ ነው ተብሏል።

በዚህ መሰረትም በሀገሪቱ የተለያዩ ክፍሎች የሚገኙ የፖሊስ ጣቢያዎች በማዕከላቸው የሚገኙ ከመጠን በላይ ወፍራም ፖሊሶችን ወደ ጣቢያው እየላኩ መሆኑ ተገልጿል።

ፖሊሶቹ በስልጠና ማዕከሉ በሚኖራቸው ቆይታም ውፍረትንና ቦርጭን ሊያስወግዱ የሚችሉ ስፖርታዊ እንቅስቃሴዎችን የሚያደርጉ  መሆኑ ነው የተገለፀው።

ይህም ፖሊሶቹ በዕለታዊ ስራቸው ላይ የሚያጋጥሟቸውን  የተለያዩ ወንጀል ነክ ድርጊቶችን በተቀላጠፈና ብቃት ባለው ሁኔታ  ለመቆጣጠር የሚያስችላቸው መሆኑን የፕሮግራሙ አስተባባሪ ማጂ ሶርንፔች ተናግረዋል።

በማሰልጠኛ ካማፑ ወፍራም ፖሊሶች  እንቅስቃሴ ሲያደርጉ የሚያሳይ ምስል በማህበራዊ ሚዲያዎች የተሰራጨ ሲሆን፥ ይህም በበርካታ ሰዎች ዘንድ ግርምት መፍጠሩ በዘገባው ተመላክቷል።

ምንጭ ፦ኦዲቲ ሴንትራል

You might also like
Comments
Loading...