Fana: At a Speed of Life!

ወደ ጀርመን በመብረር ላይ የነበረ የብሪትሽ አየር መንገድ አውሮፕላን በስህተት ስኮትላንድ አረፈ

አዲስ አበባ፣ መጋቢት 18፣ 2011 (ኤፍ.ቢ.ሲ) ወደ ጀርመኗ ደሰልፎርድ ከተማ በመብረር ላይ የነበረ የብሪታንያ አየር መንገድ አውሮፕላን በስህተት የስኮትላንዷ ኤደንብራህ ከተማ ማረፉ ተሰምቷል።

የበረራ ቁጥሩ BA 3271 የሆነው አውሮፕላን ከለንደን ከተማ አውሮፕላን ማረፊያ የተነሳው ወደ ጀርመኗ ደሰልፎርድ ከተማ ለመብረር ነበር።

ሆኖም ግን አውሮፕላኑ የተገኘው በስኮትላንዷ ኤደንብራህ ከተማ ሲሆን፥ አውሮፕላኑ የተሳሳት ስፍራ ማረፉን ያወቁትም ተሳፋሪዎች ናቸው ተብሏል።

ተሳፋሪዎቹ አውሮፕላኑ የተሳሳተ ስፍራ ላይ ማረፉን የተረዱትም “እንኳን ወደ ኤደንብራህ ከተማ በደህና መጡ” የሚለውን ድምፅ ሲሰሙ መሆኑንም ከአካባቢው የወጡ መረጃዎች ጠቁመዋል።

አውሮፕላኑ የተሳሳተ ቦታ ሊያርፍ የቻለው ከአየር መንገዱ ሰራተኞች አንዱ የተሳሳተ መርሃ ግብር ኢሜይል በማድረጉ ሳይሆን አይቀርም በሚል ተገምቷል።

የብሪትሽ አየር መንድ ቃል አቀባይ በጉዳዩ ዙሪያ በሰጡት ማብራሪያ፥ የብሪትሽ አየር መንድ የተሳሳተ የበረራ መርሃ ግብር እንዴት ተላከ የሚለውን እያጣራ ነው ብለዋል።

“ጉዟቸው የተስተጓጎለባቸውን መንገደኞቻችንን በሙሉ ይቅርታ እንጠይቃለን፤ ሁሉንም ለየብቻ አግኝተን እናነጋግራለን” ሲሉም ገልፀዋል።

በወቅቱ አውሮፕላኑ ላይ የተሳፈሩ ሰዎች በሰጡት አስተያየት፥ የአውሮፕላኑ አብራሪ “አሁን ኤደንብራህ ደርሰናል” ሲል ሁሉም ቀልድ መስሎት ስቆ ነበር፤ በኋላ ላይ ግን የበረራ አስተናጋጆችን ስንጠይቅ እውነት መሆኑን ነገሩን ብለዋል።

በኋላ ላይ አብራሪው ወደ ጀርመን ደሰልፎርድ ከተማ መጓዝ የሚፈልግ ካለ እጁን ያውጣ ሲል ሁሉም እጁን አወጣ ብለዋል ተሳፋሪዎቹ።

የአውሮፕላን አብራሪው በበኩሉ፥ ጉዳዩ እንዴት ተከሰተ በሚለው ምንም እንደማያውቅና ከዚህ ቀደም እንዲህ አይነት ነገር አጋጥሞት እንደማያውቅ፤ ጉዳዩም እየተጣራ መሆኑን አስታውቋል።

በኋላ ላይ የተሳሳተ ስፍራ ያረፈው አውሮፕላን ተሳፋሪዎቹን በመያዝ ወደ ጀርመኗ ደሰልፎርድ ከተማ ያቀና ሲሆን፥ ለእያንዳንዱ ተሳፋሪም ለተፈጠረው ስህተት ካሳ 284 የአሜሪካ ዶላር ተከፍሏቸዋል ነው የተባለው።

ምንጭ፦ www.xinhuanet.com

You might also like
Comments
Loading...