Fana: At a Speed of Life!

ቻይና “ዋሽንግተን በውስጥ ጉዳዬ ላይ የምታደርገውን አላስፈላጊ ጣልቃ ገብነት ልታቆም ይገባል” ስትል አስጠነቀቀች

አዲስ አበባ፣መጋቢት 05፣2011 (ኤፍ.ቢ.ሲ) ቻይና ዋሽንግተን በሀገሯ የውስጥ ጉዳይ ላይ የምታደርገውን አላስፈላጊ ጣልቃ ገብነት እንድታቆም አስጠነቀቀች።

አሜሪካ ቻይና በሀገሪቱ ውስጥ የሚገኙ የእስልምና እምነት ተከታዮችን ሰብዓዊ መብት እየጣሰች ነው ማለቷን ተከትሎ የቻይና የውጭ ጉዳይ ሚኒስቴር ቃል አቀባይ ሉ ካን መግለጫ ሰጥተዋል ።

ሉ ካን በመግለጫቸው አሜሪካ በሀገር ውስጥ ጉዳይ ላይ የምታደርገውን አላስፈላጊ ጣልቃ ገብነት እንድታቆም አስጠንቅቀዋል።

አሜሪካ በቻይና የሚኖሩ የእስልምና እምነት ተከታዮች ላይ ተፈፀመ የምትለው የሰብዓዊ መብት ጥሰትም መሰረት ቢስና አላስፈላጊ ውንጀላ ሲሉ አጣጥለውታል።

ሉ ካን አክለውም ቻይና በሀገሪቱ ውስጥ የሚገኝን የማንኛውም ዜጋ ሰብዓዊና ዴሞክራሲያዊ መብት ከመቼውም ጊዜ በበለጠ እያስከበረች መሆኑን ጠቁመዋል።

ስለሆነም ዋሽንግተን በቂ የሆነ መረጃ ሳይኖራት በቻይና ላይ ውንጀላ ከምታቀርብ ይልቅ በሀገሯ ውስጥ የሚፈጸመውን የሰብዓዊ መብት ጥሰት እንድትመረምር አሳስበዋል።

በአሁኑ ወቅት በአሜሪካ ጾታዊ መድልዎ፣ የኢኮኖሚ አለመመጣጠን፣ የሰብዓዊ መብት ጥሰት እና ሌሎች መሰል ችግሮች የሚስተዋሉ መሆኑን መረጃው አለን ብለዋል።

ምንጭ ፦ሲ.ጂ.ቲ.ኤን

You might also like
Comments
Loading...