Fana: At a Speed of Life!

ትውልደ ኢትዮጵያዊው የእንግሊዝ ማውዝሆል ኤ.ኤፍ.ሲ ተጫዋች ብሄራዊ የኦሎምፒክ ቡድንን ተቀላቀለ

አዲስ አበባ፣ የካቲት 28፣ 2011 (ኤፍ.ቢ.ሲ) ለእንግሊዙ ማውዝሆል ኤኤፍሲ የሚጫወተው ኢትዮጵያዊው አሚን መሃመድ ብሄራዊ የኦሎምፒክ ቡድንን ተቀላቀለ።

በእንግሊዙ ማውዝሆል የእግር ኳስ አካዳሚ እየተጫወተ የሚገኘው አሚን መሃመድ በቶኪዮ የሚካሄደው የ2020 የኦሎምፒክ ጨዋታዎች ላይ ኢትዮጵያን ወክሎ ለመጫወት ነው የወንዶች ብሄራዊ የኦሎምፒክ ቡድኑን የተቀላቀለው።

የእግር ኳስ ተጫዋቹ አሚን መሃመድ ባሳለፍነው ማክሰኞ በኢንስትራክተር አብረሃም መብራቱ እየተመራ ልምምዱን እያደረገ ያለውን ብሄራዊ የኦሎምፒክ ቡድኑን 34ኛ እጩ ተጫዋች ሆኖ መቀላቀሉም ተሰምቷል።

ኢንስትራክተር አብረሃም መብራቱ በሰጡት አስተያየት፥ ተጫዋቹ በራሱ ተነሳሽነት ለሀገሩ ለመጫወት መምጣቱ በሌሎች ተጫዋቾች ዘንድ ጥሩ መነሳሳትን የሚፈጥር ነው ብለዋል።

አሚን መሃመድ ከቡድኑ ጋር የሚያደርገው ቆይታ የሚወሰነውም በቀጣይ ቀናት ከቡድኑ ጋይ የሚያደርገው እንቅስቃሴ ታይቶ መሆኑንም አስታውቀዋል።

ትውልደ ኢትዮጵያዊው አሚን መሃመድ በእንግሊዝ የእግር ኳስ ክለቦቹ በማንቼስተር ሲቲ እና ሊድስ ዩናይትድ ቆይታን ማድረጉ ይነገራል።

በማንቼስተር ሲቲ እግር ኳስ ክለብ ውስጥም ተስፋ የሚጣልበት ተጫዋች በመሆን ለስድስት ዓመታት መዝግቦ አብሯቸው ሲሰራ እንደቆየም ተነግሯል።

በተመሳሳይ ዜና የኢትዮጵያ ወንዶች ከ23 ዓመት በታች ብሄራዊ የኦሎምፒክ ቡድን በትናንትናው እለት በይፋ ልምምድ ማድረግ ጀምሯል።

ለ33 የሀገር ውስጥ ተጫዋቾች እና ለአንድ በውጭ ሀገር ለሚጫወት ተጫዋች ጥሪ ያደረገው የኦሎምፒክ ቡድኑ በትናንትናው እለት ከቀኑ 9 ሰዓት ከ30 ጀምሮ በአዲስ አበባ ስታዲየም ለሁለት ሰዓታት የቆየ ልምምድ ማድረጉንም ከኢትዮጵያ እግር ኳስ ፌዴሬሽን ያገኘነው መረጃ ያመለክታል።

ልምምዱን አስመልክቶ አስተያየት የሰጡት ኢንስትራክተር አብረሃም መብራቱ፥ ቡድኑ በቀን ሁለት ጊዜ ልምምድ እንደሚሰራ እና የክፍል ንድፈ ሀሳብ ትምህርቶች እንደሚሰጡት ገልፀዋል።

በቀጣይም የወዳጅነት ጨዋታዎቸን በማድረግ ተጫዋቾችን ለመለየት እንደሚሰሩ ነው አሰልጣኙ ያስታወቁት።

 

 

 

You might also like
Comments
Loading...