Fana: At a Speed of Life!

በ2 ነጥብ 4 ቢሊየን ብር ወጪ የሚገነባው የኢትዮጵያ ኤሌክትሪክ ኃይል ዋና መስሪያ ቤት ግንባታ ተጀመረ

አዲስ አበባ፣ መጋቢት 6፣ 2011 (ኤፍ.ቢ.ሲ) በ2 ነጥብ 4 ቢሊየን ብር ወጪ የሚገነባው የኢትዮጵያ ኤሌክትሪክ ኃይል ዋና መስሪያ ቤት ግንባታ ተጀመረ።

ህንፃው ከመሬት ሥር የሚገነቡትን ወለሎች ጨምሮ 38 ፎቅ እንደሚኖረው የተገለጸ ሲሆን፥ 47 ሺህ 881 ሜትር ስኩዌር መሬት ላይ እንደሚርፍም ነው የተገለጸው።

የግንባታው  ሙሉ የፋይናንስ ወጪ በኢትዮጵያ ኤሌክትሪክ ኃይል እንደሚሸፈንም ተገልጿል።

በግንባታው ማስጀመር ስነ ስርዓት ላይ የኢትዮጵያ ኤሌክትሪክ ኃይል ዋና ሥራ አስፈፃሚ ዶክተር አብርሃም እንደገለጹት፥ ተቋሙ እንደ አዲስ ከተደራጀ በኃላ የኃይል ዘርፉን ለማሳደግ እየሰራ ነው።

ይሁን እንጂ የራሱ የሆነ ቋሚ ቢሮ ስለሌለው ለከፍተኛ ወጪ ሲዳረግ መቆየቱን ነው የተናገሩት።

የህንፃው መገንባት ተቋሙ የተሰጠውን ሃገራዊ ተልዕኮና ኃላፊነት በአግባቡ እንዲወጣ ከማገዙም ባሻገር አገልግሎት አሰጣጡን ፈጣንና ውጤታማ እንደሚያደርገው ዶክተር እብርሃም ተናግረዋል።

ህንፃው በተያዘለት ጊዜ፣ በጀትና በሚፈለገው ጥራት ተገንብቶ አገልግሎቱን እንደሚጀምር ያለቸውን ተስፋ ገልጸዋል።

ግንባታው ሲ.ጂ.ሲ.ኦ.ሲ በተባለው የቻይና ኩባንያ የሚካናወን ሲሆን፥ በተለያዩ ምክንያቶች የዘገየው የተቋሙ ህንፃ ግንባታ ሥራ መጀመሩ እንዳስደሰታቸው የተቋራጭ ኩባንያው ዋና ሥራ አስኪያጅ ሚስተር ጋኦ ሊገልጸዋል።

ኩባንያቸው ከኢትዮጵያ ኤሌክትሪክ ኃይል ጋር የቀደመ መልካም የሥራ ግንኙነት እንደነበረው ጠቅሰው፥ ግንባታውን በጥራትና በተያዘለት የጊዜ ሰሌዳ መሠረት አጠናቀው እንደሚያስረክቡ ቃል መግባታቸውን ነው ከኢትዮጵያ ኤሌክትሪክ ኃይል ያገኘነው መረጃ የሚያመለክተው።

You might also like
Comments
Loading...