Fana: At a Speed of Life!

በኢትዮጵያ የደረሰው የአውሮፕላን አደጋ የብዙ ሀገራት ዜጎችን ቢጎዳም ዓለምን የበለጠ አስተሳስሯል­- ፕሬዚዳንት ማክሮን

አዲስ አበባ፣ መጋቢት 5፣ 2011 (ኤፍ.ቢ.ሲ) በኢትዮጵያ ባሳለለፍነው ሳምንት የደረሰው የአውሮፕላን አደጋ የብዙ ሀገራት ዜጎችን ቢጎዳም ዓለም የበለጠ አስተሳስሯል­ አሉ የፈረንሳዩ ፕሬዚዳንት ኢማኑኤል ማክሮን።

የፈረንሳይ ፕሬዚደንት ኢማኑዬል ማክሮን ይህን ያሉት በናይሮቢ “አንድ ዓለም” በሚል ርዕስ በአፍሪካ አህጉር ለመጀመሪያ ጊዜ እየተካሄደ ባለው ጉባኤ ነው።

ኢትዮጵያ በኬንያ ናይሮቢ በዛሬው እለት መጋቢት 5 ቀን 2011 ዓ.ም በተጀመረው ”የአንድ ፕላኔት ጉባኤ” ላይ በልኡካን ቡድኗ እየተሳተፈች ትገኛለች።

ኢትዮጵያ ልኡካን ቡድንን በመምራት በጉባኤው የተገኘቱት የአካባቢ፣ ደንን አየር ንብረት ለውጥ ኮሚሽን ኮሚሽነር ፕሮፌሰር ፈቃዱ በየነ ናቸው።

በዛሬው እለት በተከፈተው ጉባዔ ላይም ለጉብኝት ኬንያ የሚገኙት የፈረንሳይ ፕሬዚዳንት ኢማኑኤል ማክሮን ንግግር አድርገዋል።

ፕሬዝዳንት ማክሮን በመክፈቻ ንግግራቸው፥ “በኢትዮጵያ ባሳለለፍነው ሳምንት የደረሰው አሳዛኝ አደጋ የዓለም ሀገራትን በዚህ ፈታኝ ወቅት እንደ አንድ ቤተሰብ አንዲቆሙ አድርጓቸዋል” ብለዋል።

በእሳቸው ጠያቂነትም ለተጎጂዎቹ የአንድ ደቂቃ የህሊና ፀሎት የተደረገ ሲሆን፥ ለኢትዮጵያ ሕዝብና መንግስትም መፅናናትን ተመኝተዋል።

የኬንያው ፕሬዚደንት ኡሁሩ ኬንያታም በአደጋው ጉዳት ለደረሰባቸው ሰዎች ቤተሰቦች፥ ጓደኞችና የሥራ ባልደረቦች መፅናናትን ተመኝተዋል።

ፕሬዝዳንት ኡሁሩ ኬንያታ በንግግራቸው፥ የዘንድሮ ጉባኤ ለመጀመሪያ ጊዜ በአፍሪካ መካሄዱ ልዩ እንደሚያደርገው አስታውቀዋል።

ስብስባው ከጊዜ ወደ ጊዜ እያደገ የመጣውን የአየር ንብረት ለውጥ ተጽዕኖ ለመቋቋም የሚያስቸሉ ውሳኔዎች እንደሚወሰኑበት እምነታቸው መሆኑን ገልጸዋል።

ፕሬዚዳንት ኬንያታ አክለውም፥ በቅርቡ የተባበሩት መንግስታት ድርጅት ዋና ጸሃፊ አንቶኑዮ ጉቴሬዝ የኢፌዴሪ የውጭ ጉዳይ ሚኒስትር ዶክተር ወርቅነህ ገበየሁን የድርጅቱ ረዳት ዋና ጸሀፊ አድርገው በተመድ የኬንያ ቢሮ በመሾማቸው የተሰማቸውን ደስታ ገልፀዋል።

በኬንያ ቆይታቸውም ለስራቸው መቃናት የሀገሪቱ ህዝብና መንግስት አስፈላጊውን ድጋፍ ሁሉ እንደሚያደርግላቸው መግለፃቸውን ከውጭ ጉዳይ ሚኒስቴር ቃል አቀባይ ጽህፈት ቤት ያገኘነው መረጃ ያመለክታል።

 

 

You might also like
Comments
Loading...