Fana: At a Speed of Life!

በአድዋ ጦርነት ዘመቻ የተለያዩ የኦሮሞ ብሄር አባላት ከ120 ዓመታት በኋላ ተገናኙ

አዲስ አበባ፣ መጋቢት 19፣ 2011 (ኤፍ.ቢ.ሲ) ከምዕራብ ሸዋ ዞን ከኤጀርሳ ለፎ ወረዳ በ1888 ዓ.ም የጣሊያን ወራሪ ሀይል ለመዋጋት ዘምተው ወደ ትውልድ ቀያቸው ሳይመለሱ የቀሩ የኦሮሞ ብሄር አባላት ከ120 ዓመታት በኋላ ተገናኙ፡፡

መነሻቸው ከምዕራብ ሸዋ ዞን ከኤጀርሳ ለፎ ወረዳ የሆኑት የብሄሩ አባላት ጦርነቱ በድል ከተጠናቀቀ በኃላ ወደ ቀያቸው ሳይመለሱ ይቀራሉ፡፡

ወደ ቀያቸው ሳይመለሱ የቀሩት የተወሰኑት አባላት ሀገራቸውን በወታደርነት ለማገልገል ወደ ሀዲያ  መጓዛቸው ነው የተነገረው፡፡

ወደ ሀድያ ካቀኑ በኋላም ህይወታቸውን በቋሚነት መምራት የጀመሩት እነዚህ የአንድ ብሄር አባላት በዚያው ቤተሰብም ያፈራሉ የአካባቢውን ባህልና ወግ እንዲሁም ቋንቋ ይወርሳሉ፡፡

የቀድሞ ወታደር ቤተሰቦች ለ122 ዓመታትም ስለ ቤተሶቻቸውና ዘመድ አዝማዶቻቸው ያለምንም መረጃ ቆይተዋል፡፡

ለረጅም ዓመታት ግን  ዘመዶቻቸውን ለመፈለግ ሲደክሙ መቆየታቸው የተነገረ ሲሆን፥ በመጨረሻም በምዕራብ ሸዋ ዞን በኤጀርሳ ላፎ ወረዳ የሚኖሩ ዘመዶች  እንዳላቸው በቀይ መስቀል በኩል መረጃው እንደደረሳቸው ነው ኦቢኤን በዘገባው ያሰፈረው፡፡

ይህንን ተከትሎም እነዚህ በሀድያ ዞን ከነበሩት የኦሮሞ ብሄር የተወሰኑት በምዕራብ ሸዋ ዞን ከሚገኙ ዘመዶቻቸውን ጋር ተገናኝተዋል፡፡

በኤጀርሳ ለፎ ወረዳ የሚኖሩ የቀድሞ ወታደር ቤተሰቦች ዘመዶቻቸው ወደ ደቡብ ክልል መሔዳቸውን ቢያውቁም በትክክል የት እንደሚኖሩ መረጃው እንዳልነበራቸው በስነስርዓቱ ላይ  ተናግረዋል፡፡

አሁን የተገናኙት የያኔ ዘመዶቻቸው የልጅ ልጆች ሲሆኑ፥ ለመገናኘታቸው ትልቁን ኃላፊነት ለተወጣው ለቀይ መስቀል ማህበርም ምስጋና አቅርበዋል፡፡

You might also like
Comments
Loading...