Fana: At a Speed of Life!

በአሶሳ ከተማ ለሚገነባው የኢንዱስትሪ ፓርክ የቦታ ዝግጅት እያደረገ መሆኑን የከተማዋ አስተዳደር አስታወቀ

አዲስ አበባ ፣ የካቲት 27 ፣ 2011 (ኤፍ ቢ ሲ) በቤኒሻንጉል ጉሙዝ ክልል አሶሳ ከተማ ለሚገነባው የኢንዱስትሪ ፓርክ የቦታ ዝግጅት እያደረገ መሆኑን የአሶሳ ከተማ አስተዳደር አስታወቀ።

አሁን ላይ በሃገር አቀፍ ደረጃ በልማት ዘርፍ ከተያዙ የልማት እቅዶች መካከል 18 የኢንዱስትሪ ፓርኮችን መገንባት አንደኛው ነው።

የኢንዱስትሪ ፓርኮች ልማት ኮርፖሬሽን የኢንዱስትሪ ፓርኮች ኦፕሬሽን እና ማኔጅመንት ምክትል ዋና ስራ አስፈጻሚ አቶ ሽፈራው ሰለሞን እንደሚሉት በእቅድ የተያዙት የኢንዱስትሪ ፓርኮች በሚቀጥሉት ሁለት አመታት ይገነባሉ።

ከእነዚህ የኢንዱስትሪ ፓርኮች መካከል አንደኛው በቤኒሻንጉል ጉሙዝ ክልል የሚገነባው የአሶሳ አግሮ ኢንዱስትሪ ፓርክ ይገኝበታል።

አሁን ላይም የኢንዱስትሪ ፓርኩን መገንባት የሚያስችል ጥናት የተጠናቀቀ ሲሆን፥ ጥናቱን መነሻ ያደረገ የቦታ ልየታ ተሰርቶ ቅድመ ዝግጅት እየተከናወነ ነው።

የኢንዱስትሪ ፓርኩ በሲቪል ሰርቪስ ዩኒቨርሲቲ እየተጠና ባለው እና በግንቦት ወር ተጠናቆ ተግባር ላይ እንደሚውል በሚጠበቀው አዲሱ የከተማዋ ማስተር ፕላን መሰረት እንደሚገነባም የከተማዋ ከንቲባ አቶ ኡመር አህመድ ተናግረዋል።

የኢንዱስትሪ ፓርኩ የራሱ የህግ ማዕቀፍ ይኖረዋል ያሉት ከንቲባው፥ በግንባታ ወቅት ብዙ ሰው ከቦታው እንደማይነሳና ለሚነሱትም በቂ ካሳ እንደሚሰጣቸውም ነው የተናገሩት።

የክልሉ መንግስትም ለፓርኩ ግንባታ መሳካት ትኩረት ሰጥቶ እንደሚሰራ እና አስፈላጊውን ድጋፍ እንደሚያደርግም አስረድተዋል።

የፓርኩ ተገንብቶ ወደ ስራ መግባት በክልሉ ለሚገኘው ወጣት ሰፊ የስራ እድል ይፈጥራል ተብሎ ይጠበቃል።

ባለፉት አመታት በሃገሪቱ በኢንዱስትሪ ዘርፍ ብቻ ለ3 መቶ ሺህ ዜጎች የስራ እድል መፈጠሩን ከኮርፖሬሽኑ ያገኘነው መረጃ ያመላክታል።

 

 

በታሪክ አዱኛ

 

 

 

You might also like
Comments
Loading...