Fana: At a Speed of Life!

በምዕራብ፣ ምስራቅ ጉጂና ጌዲኦ ዞኖች በተለያዩ መጠለያ ለሚገኙ ተፈናቃች የሚደረገው ሰብዓዊ እርዳታ በቀጣይነት እየቀረበ ነው – የሰላም ሚኒስቴር

አዲስ አበባ፣ መጋቢት 7፣ 2011 (ኤፍ.ቢ.ሲ) በምዕራብ፣ ምስራቅ ጉጂና ጌዲኦ ዞኖች በተለያዩ መጠለያ ለሚገኙ ተፈናቃች የሚደረገው ሰብዓዊ እርዳታ በቀጣይነት እየቀረበ መሆኑን የሰላም ሚኒስቴር አስታወቀ።

የኢፌዴሪ የሰላም ሚኒስትር ወይዘሮ ሙፈሪያት ካሚል ዛሬ ለመገናኛ ብዙሃን በሰጡት ጋዜጣዊ መግለጫ እንዳገለጹት፥ በምስራቅና ምዕራብ ጉጂ እና በጊዲኦ ዞኖች የሚገኙ ተፈናቃችን በቋሚነት ለማቋቋም የኦሮሚያ ብሄራዊ ክልላዊ መንግስት፣ የደቡብ ብሄራዊ ክልላዊ መንግስና የፌደራል መንግስት በጋራ እየሰሩ ይገኛሉ።

በአንዳንድ የመገናኛ ብዙሃን በጌዲኦና ምስራቅ ጉጂ ዞን ለስምንት ወራት ያህል ለተፋናቃቹ ምንም አይነት ሰብአዊ እርዳታ እንዳልደረሳቸው የሚሰጠው አስተያየት ስህተት እንደሆነ ነው የገለጹት።

በትናንትናው እለትም በስፍራው በመገኘት ከተፋናቃይ ተወካዮች ጋር ባደረጉት ውይይት ለተፈናቃዮች ለስምንት ወራት ምንም አይነት ሰብዓዊ እርዳታ አልደረሰም የተባለው ጉዳይ ሃሰት መሆኑን ማረጋገጣቸውን አስረደተዋል።

መንግስት ባለፉት ጊዚያት በአጠቃላይ በሀገሪቱ የተለያዩ አካባቢዎች ከቀያቸው የተፈናቀሉ ዜጎችን ወደቀያቸው ለመመለስና በዘላቂነት ለመቋቋም በኢፌዴሪ ጠቅላይ ሚኒስተር ዶክተር አብይ አህመድ ግብረ ሃይል ተቋቁሞ ለዜጎች ሰብዓዊ እርዳታ የማቅረብ ስራ ሲከናወን መቆየቱን አስታውሰዋል።

በሰላም ሚኒስትሯ ወይዘሮ ሙፈሪያት ካሚል የሚመራ የሚኒስቴር መስሪያ ቤቶችን ያከተተ ግብረ ሃይልም ለዜጎች የምግብና የጤና አገልግሎት ድጋፎች እና ቀጣይም ዜጎቹ በቋሚነት እንዲቋቋሙ የማድረግ ስራ እየተከናወነ እንደሚገኝም ነው የገለጹት።

ዜጎቹ በቋሚነት እንዲቋቋሙ የሚያግዝ ጥናት ተጠንቶ ተግባራዊ የማድረግ ሂደት ላይ እየተሰራ መሆኑም አንስተዋል።

ይሁን እንጅ የተፋናቃዮች ሰብዓዊ እርዳታ የሚውሉ ምግብና ምግብ ነክ ያልሆኑ አቅርቦቶች ላይ አልፎ እልፎ ስርቆትና ንጥቂያ እንደሚፈጸሙም ጠቁመዋል።

በተለይም በጉጂዞን የተደራጁ ቡድኖች እርዳታው በወቅቱ እንዳይደርስ፣ ለግል ጥቅማቸው ማዋልና በተለያዩ የአመራር ችግሮች ስርጭት ላይ መስተጓጎሎች እንዲሚከሰቱ ነው የገለጹት።

ከዚህ ውጪ መንግስት ለተፋናቃዮች የሚያደርገው ድጋፍ እንዳልተቋረጠ የገለጹት ሚኒስትሯ፥ በትናትናው እለት በጌዲኦ ዞን ባሉ ወረዳዎች የሚገኙ ተፈናቃዮች መጠለያ ባከሄዱት ጉብኝትም የሰብዓዊ እርዳታው እየቀረበ መሆኑን ማራጋገጣቸውና መስተጓጎል እንዳላጋጠማቸው ነው የተናገሩት።

ለተፈናቃይ እናቶችና ህፃናት በሰባዊ እርዳታ አቅርቦቱ ልዩ ተኩረት መሰጠቱንም ነው ገለጹት፡፡

በውሃ አቅርቦት ላይ ውስነነቶች መኖራቸውን የተናገሩት ሚኒስትሯ፥ ተፈናቃዮች ለውሃ ወለድ በሽታ ተጋላጭ ሊሆኑ እንደሚችሉ ጠቁመዋል።

በማህበራዊ ሚዲያዎች ከተፋነቃዮች ጋር በተያያዘ የሚለቀቁ ምስሎች ከምግብ እጥራት ጋር በተያያዘ ነው ወይንስ በጤና መታወክ የሚለው ጉዳይ መጣራት የሚያስፈልገው እንደሆነም ነው የገለጹት።

በመለሰ ምትኩ

You might also like
Comments
Loading...