Fana: At a Speed of Life!

ሜጀር ጀኔራል ክንፈ ዳኘውን ጨምሮ በ7 ተከሳሾች ላይ ዐቃቤ ህግ የተሻሻለ ክስ አቀረበ

አዲስ አበባ፣ መጋቢት 4፣ 2011 (ኤፍ.ቢ.ሲ) ሜጀር ጀኔራል ክንፈ ዳኘውን ጨምሮ በሰባት ተከሳሾች ላይ ዐቃቤ ህግ የተሻሻለ ክስ አቀረበ።

የፌዴራሉ ከፍተኛ ፍርድ ቤት ልደታ ምድብ 15ኛ የወንጀል ችሎት በዛሬው ዕለት በተከሻሶች ላይ የቀረበውን የተሻሻለ ክስ አድምጧል።

ተከሳሾቹም 1ኛ ሜጀር ጀኔራል ክንፈ ዳኘው፣  2ኛ ብርጋዴር ጀኔራል ጥጋቡ ፈትለ፣ 3ኛ ሻለቃ ገብረስላሴ ገብረጊዮርጊስ፣ 4ኛ ሻለቃ ፋሲል አበራ ሃይሉ፣ 5ኛ መቶ አለቃ ቶማስ ደረሰ፣ 6ኛ ወሰንየለህ ኃይለሚካኤል፣ 7ኛ ተከሳሽ ህድአት ወልደተንሳይ እና 8ኛ ዶክተር መኮንን ገብረሚካኤል ናቸው።

የዐቃቤ ህግ የክስ መዝገብ እንደሚያስረዳው፥ ተከሳሾች በአሜሪካም ሆነ በኢትዮጵያ ደረጃ የማይታወቅና ከብረታ ብረትና ኢንጅነሪንግ ኮርፖሬሽን የትምህርትና ስልጠና አፈፃፀም መመሪያ ውጭ “ካሊፎርኒያ ኢንተርናሽናል ኢንስቲትዩት ኦፍ ቴክኖሎጂ” በሚል ሀሰተኛ ተቋም በማቋቋም ከብረታ ብረትና ኢንጅነሪንግ ኮርፖሬሽን የውል ስምምነት እንዲፈፀም ማድረጋቸውን የቀረበባቸው ክስ ያመለክታል።

የተሻሻለው ክስ  ክፍያው በውጭ ምንዛሬ እንዲሆን በማድረግ  እና ድርጊቱ በኢትዮጵያ መንግስት እንዳይታወቅ መምህራን በቱሪስት ቪዛ ከውጭ በማስመጣት እና ያለ ትምህርት ዲግሪ በመስጠት እንዲሁም በማስተማር ሽፋን የሀገሪቱን የውጭ ምንዛሬ ወደ ውጭ በማሸሽ ወንጀል መከሰሳቸውን አመልክቷል።

ሀሰተኛ የትምህርት ተቋሙ በታዳሽ ሀይልና በኦፕሬሽን ማኔጅመንት በማስተርስ እና በዶክትሬት ደረጃ ትምህርት ለመስጠት በ2006 የ1ሚሊየን 393 ሺህ 300 የአሜሪካ ዶላር፣ በ2007 የ698 ሺህ 650 ዶላር እንዲሁም በ2008 ዓ.ም የ1 ሚሊየን 397 ሺህ 300 ዶላር ውል መፈረሙን ነው የተሻሻለው ክስ የሚያመላክተው።

እንዲሁም ስርዓት ትምህርት ሳይቀረፅ ትምህርት መስጠት መጀመሩን ክሱ ያመለከተ ሲሆን፥  በተመሳሳይ በ2009 ዓ.ም በኢንዱስትሪያል ኢኮኖሚክስ በማስተርስና በዶክትሬት ደረጃ ትምህርት ለመስጠት የ1 ሚሊየን 903 ሺህ 225 የአሜሪካ ዶላር ከብረታብረትና ኢንጅነሪንግ ኮርፖሬሽን ውል መውሰዱን የተሻሻለው የዐቃቤ ህግ የክስ መዝገብ ያስረዳል።

ተከሳሾች በሶስት የተለያዩ የትምህርት መስኮች በአሜሪካም ሆነ በኢትዮጵያ ደረጃ ከማይታወቅ የፈጠራ ተቋም ትምህርት ለመስጠት በሚል እሳቤ አራት ውሎችን በመዋዋል ለሀሰተኛ ተቋሙ 3 ሚሊየን 901 ሺህ 140 ዶላር ወይም 75 ሚሊየን 114 ሺህ 030 የኢትዮጵያ ብር አሜሪካ ሀገር በከፈታቸው የሂሳብ ቁጥሮች ገቢ ማድረጋቸውን የተሻሻለው የዐቃቤ ህግ የክስ መዝገብ አብራርቷል።

የፌዴራሉ ከፍተኛ ፍርድ ቤት ልደታ ምድብ 15ተኛ የወንጀል ችሎትም  ዛሬ በዋለው ችሎት ተከሳሾች ዐቃቤ ህግ ያቀረበባቸውን የተሻሻለ ክስ መሰረት በማድረግ በፅሁፍ ያለቸውን አስተያየት እንዲያቀርቡ ለመጋቢት 9 ቀን 2011 ዓ.ም  ብይን ሰጥቷል።

 

You might also like
Comments
Loading...