Fana: At a Speed of Life!

መንግሥት በኢትዮጵያ ቆርኪና ጣሳ ማምረቻ ኢንዱስትሪ አ.ማ የነበረውን የ75 በመቶ ድርሻ በሽያጭ ለማስተላለፍ የሚያስችል ውል ተፈረመ

አዲስ አበባ፣ መጋቢት 3፣ 2011(ኤፍ.ቢ.ሲ) መንግሥት በኢትዮጵያ ቆርኪና ጣሳ ማምረቻ ኢንዱስትሪ አ.ማ የነበረው የ75 በመቶ የአክሲዮን ድርሻ ለማስተላለፍ  የሚያስችል የ45 ነጥብ 5 ሚሊየን ብር ቅድመ ከፍያ ገቢ የሽያጭ ውል ዛሬ ተፈረመ።

መንግሥት በኢትዮጵያ ቆርኪና ጣሳ ማምረቻ ኢንዱስትሪ አ.ማ የነበረውን ድርሻ ሙሉ በሙሉ ወደ ግል ባለሀብት ለማዘዋወር ቀደም ሲል ተደጋጋሚ የጨረታ ማስታወቂያ ማውጣቱ ይታወቃል።

በባለፈው በጀት ዓመት በወጣው ጨረታ ቁጥር ዐዐ1/2ዐ17-2ዐ18 ጂ.ሲ.ኤፍ ቢዝነስ ግሩፕ ኃላፊነቱ የተወሰነ የግል ማህበር የተሰኘ ብቸኛ ተጫራች ቀርቦ የብር 13ዐ ሚሊየን ዋጋ መስጠቱን ድርጅቱ አስታውቋል።

ይህ ዋጋም ከአክሲዮን ድርሻው ጠቋሚ ዋጋ 125 ነጥብ 9 ሚሊየን ብር በላይ በመሆኑ  ድርጅቱ ገዥው ያቀረበውን ዋጋ አፅድቋል።

በዚህ መሰረትም ገዥው የቅድሚያ ክፍያውን ማለትም የዋጋውን 35 በመቶ ወይም 45 ነጥብ 5 ሚሊየን ብር ገቢ በማድረግ በዛሬው ዕለት  የሸያጭ ውሉን ተፈራርሟል።

የግዥ ውሉንም የመንግሥት የልማት ድርጅቶች ይዞታና አስተዳደር ኤጀንሲ ዋና ዳይሬክተር አቶ በየነ ገብረመስቀል እና የሲ.ጂ.ኤፍ ዋና ሥራ አስኪያጅ አቶ ግርማይ ፈረደ ተፈራርመውታል።

የመንግሥት የልማት ድርጅቶች ይዞታና አስተዳደር ኤጀንሲ ኮርፖሬት ኮሙዩኒኬሽን ዳይሬክተር አቶ ወንዳፍራሽ አሰፋ ቀሪውን 65 በመቶ በአምስት ዓመታት ውስጥ እኩል ክፍያ ከፍሎ እንደሚያጠናቅቅ በሽያጭ ስምምነቱ መጠቀሱን ለጣቢያችን ተናግረዋል።

ሲ.ጂ.ኤፍ ቢዝነስ ግሩፕ ኃላፊነቱ የተወሰነ የግል ማህበር በጥራጥሬ ወጪ ግንድ፣ በዘይት ማስመጣት፣በሆቴል ንግድ ሥራ እንዲሁም በቆርኪ፣ በህክምና ጓንት፣ በጣሪያ ታይልስ ማምረቻና በሌሎች ዘርፎች እየተንቀሳቀስ የሚገኝ ሀገር በቀል ኩባንያ ነው።

በታሪክ አዱኛ

 

You might also like
Comments
Loading...