Fana: At a Speed of Life!

ሀገራዊ ለውጡ የኢንቨስትመንት ዘርፉን በከፍተኛ ደረጃ ማነቃቃቱን የኢንቨስትመንት ኮሚሽን ገለጸ

አዲስ አበባ፣ መጋቢት 16፣ 2011 (ኤፍ.ቢ.ሲ) ባለፉት ጊዜያት በሀገሪቱ የታየው ለውጥ የኢንቨስትመንት ዘርፉን በከፍተኛ ደረጃ ማነቃቃቱን የኢንቨስትመንት ኮሚሽን ገለጸ።

የኢትዮጵያ ኢንቨስትመንት ኮሚሽን ኮሚሽነር አቶ አበበ አበባየሁ ከፋና ብሮድካስቲንግ ኮርፖሬት ጋር በነበራቸው ቆይታ እንዳሉት ዘርፉ በተግባር የተደገፈ ለውጥ አምጥቷል።

ከዚህ በፊት በአብዛኛው ከእስያ ሀገራት ይመጣ የነበረው የኢንቨስትመንት ፍላጎት አሁን ላይ ወደ አሜሪካና አውሮፓ መስፋፋቱን ተናግረዋል።

ከቀጥታ የውጭ ኢንቨስትመንት የሚገኘውን ገንዘብ ላይ ጭማሪ መታየቱን በመግለጽ÷ ከውጭ ሀገራት ጋር የሚደረጉ ዲፕሎማሲያዊ ውይይቶችና ሌሎች ዓለም አቀፍ መድረኮችም ለዘርፉ መነቃቃት መልካም እድሎችን መፍጠራቸውን አስረድተዋል።

ከቮልስ ዋገን ኩባንያ ጋር የተደረገው ስምምነት፣ የኢግልስ ሂልስ ኩባንያ የለገሃር ፕሮጀክት፣ በዳቮሱ መድረክ ባለሃብቶችን ለመመልመል የተደረገው ጥረትና የፈረንሳዩ ፕሬዚዳንት የኢትዮጵያ ጉብኝት በያዝነው ዓመት የተመዘገቡ የዘርፉ ዲፕሎማሲያዊ ስኬቶች መሆናቸውን ጠቅሰዋል፡፡

ባለፉት አምስት ዓመታት ዘርፉ እድገት እያስመዘገበ መምጣቱን የገለጹት ኮሚሽነሩ ባሳለፍነው አንድ አመት ጊዜ ውስጥ በሀገሪቱ የተደረጉ ለውጦች ግን የዘርፉ እድገት እንዳፋጠኑትም ነው የሚናገሩት፡፡

ለዘርፉ ማደግ እንቅፋት የነበሩ ችግሮችን ለመፍታት÷ በቂ የኋላ ታሪክን ሳያጠኑ ባለሃብቶችን በማስገባት ይደርስ የነበረውን ኪሳራ ለማስቀረት፣ የውጭ ባለሃብቶች የሚፈለጓቸው ዘርፎች ተለይተውና ትኩረት ተድርጎባቸው እየተሰራ ነውም ብለዋል።

በሌላ በኩል በተወሰኑ አካባቢዎች ከሚስተዋለው ወቅታዊ የጸጥታ ሁኔታ ጋር በተያያዘ ጥያቄዎች መነሳት መጀመራቸውን ጠቁመዋል።

በኢንቨስትመንትና ሌሎች ጉዳዮች ላይ የአማካሪነት ስራ የሚሰራው የዋይ ኤች ኤም አማካሪ ኩባንያ መስራች ማኔጂንግ ዳይሬክተር አቶ ያሬድ ሃይለመስቀል በበኩላቸው፥ ከአንድ አመት በፊት በሀገሪቱ ይስተዋሉ የነበሩ ችግሮችን ተከትሎ የተደረገው ለውጥ ዘርፉን በከፍተኛ ሁኔታ አነቃቅቶታል ብለዋል።

በለውጡ የተያዙትን እቅዶች መሬት ማውረድ ላይ ግን መዘግየቶች እንደሚስተዋሉ ነው የገለጹት፡፡

በትዕግስት አብርሃም

 

 

 

 

You might also like
Comments
Loading...