Fana: At a Speed of Life!

36ኛው የጃን ሜዳ ኢንተርናሽናል ሀገር አቋራጭ ውድድር ተካሄደ

አዲስ አበባ፣የካቲት 3፣2011 (ኤፍ ቢ ሲ) 36ኛው የጃን ሜዳ ኢንተርናሽናል ሀገር አቋራጭ ውድድር በዛሬው ዕለት ተካሂዷል።

በውድድሩ ወቅትም የባህልና ቱሪዝም ሚኒስትር ዶክተር ሂሩት ካሳው ፣ ፕሮፌሰር ሂሩት ወልደማሪያም ዶክተር ጥላዬ ጌቴ እና ሌሎች የክብር እንግዶችም ተገኝተዋል፡፡

በተካሄደው የ6ኪሎ ሜትር የሴቶች ውድድር የጉና ንግድ ስፖርት አትሌትዋ ግርማዊት ገብረእግዚአብሄር አንደኛ በመውጣት ስታሸንፍ፥ አለሚቱ ታኩ 2ኛ እና ፅጌ ገ\ሰላማ ሶስተኛ በመውጣት ውድድሩን አጠናቀዋል ።

በ8 ኪሎ ሜትር የወንዶች ውድድር ደግሞ የአማራ ክልሉ ንብረት መላኩ አንደኛ በመውጣት ሲያሸንፍ ፥ፀጋዬ ኪዳኑ እና ምልኬሳ መንገሻ ደግሞ 2ኛ እና ሶስተኛ በመሆን ውድድሩን አጠናቀዋል።

የ10 ኪሎ ሜትር የአዋቂ ሴቶች 1ኛ ደራ ዲዳ (ከኦሮሚያ) 2ኛ ለተሰንበት ግደይ 3ኛ ዘነቡ ፍቃዱ ሲወጡ ፥በወንዶች ደግሞ 1ኛ ሞገስ ጥኡማን (ከመሰቦ) 2ኛ ሰለሞን በረጋ 3ኛ አንዱ አምላክ በልሁ በመሆን ውድድሩን አጠናቀዋል።

በውድድሩ ከ1 እስከ 5 የወጡ አትሌቶችም ዴንማርክ በሚካሄደው ሀገር አቋራጭ ውድድር ላይ በቀጥታ የሚሳተፉ መሆኑን የኢትዮጵያ አትሌቲክስ ፌደሬሽን አስታውቋል።

ውድድሩ ላለፉት 35 አመታት ሲካሄድ የቆየ እና በአለም አቀፍ መድረኮች በርካታ ክብረወሰኖችን የሰባበሩ አንጋፋ የኢትዮጵያ አትሌቶች ያለፉበት ነው።

ኢትዮጵያ በአለም አገር አቋራጭ ሻምፒዮና እስካሁን 264 ሜዳሊያዎችን የሰበሰበች ሲሆን፥ 100ዎቹ የወርቅ ሜዳሊያዎች ናቸው።

ይህም ከኬንያ በመቀጠል በ2ኛ ደረጃ ላእይ እንድትገኝ አድርጓታል።

You might also like
Comments
Loading...