Fana: At a Speed of Life!

ፖሊስ በተከሰከሰው አውሮፕላን ውስጥ የተገኘው አስከሬን የኤሚሊያኖ ሳላ መሆኑን አረጋገጠ

አዲስ አበባ፣ የካቲት 1፣ 2011 (ኤፍ.ቢ.ሲ) የብሪታንያ ፖሊስ የናንትሱን አጥቂ ወደ ካርዲፍ ይዛ ስትበር በነበረችው አነስተኛ አውሮፕላን ስብርባሪ ውስጥ የተገኘው አስከሬን የኤሚሊያኖ ሳላ መሆኑን አረጋገጠ።

ኤሚሊያኖ ሳላ ከሁለት ሳምንታት በፊት ከፈረንሳይዋ ከተማ ናንትስ በመነሳት ዌልስ ወደምትገኘው ካርዲፍ በማቅናት ላይ እያለ የተሳፈረባት አነስተኛ አውሮፕላን መሰወሯ የተሰማው።

ሳላ በቅርቡ ነበር ከፈረንሳዩ ናንትስ ወደ ዌልሱ ካርዲፍ ሲቲ ለክለቡ ክብረወሰን በሆነ ገንዘብ በ19 ሚሊየን ዶላር የፈረመው።

ከፊርማው በኋላ አዲሱን ክለቡን ለመቀላቀል ወደ ካርዲፍ በአነስተኛ አውሮፕላን እየተጓዘ ባለበት ወቅት፥ አውሮፕላኗ በብሪታንያ የባህር ክልል ተሰውራለች።

ይህን ተከትሎም ላለፉት ሁለት ሳምንታት የተደረገው ፍለጋ የአውሮፕላኗን ስብስርባሪ በማግኘት ተጠናቋል።

ከቀናት በፊትም በአውሮፕላኗ ውስጥ የአንድ ሰው አስከሬን ማግኘቱን የሃገሪቱ ፖሊስ ገልጾ ነበር።

ከሰዓታት በፊትም ፖሊስ የተገኘው አስከሬን የሳላ እንደሆነ ማረጋገጫ ሰጥቷል።

ጉዳዩንም ለቤተሰቦቹ አሳውቄያለሁ ነው ያለው፤ ተስፋን ይዘው ሲጠባበቁ የነበሩት ቤተሰቦቹም በመጨረሻ መራር ዜናን ሰምተዋል።

በ28 ዓመቱ አርጀንቲናዊው ኤሚሊያኖ ሳላ አደጋ ሁለቱ ክለቦች፣ የቡድን አጋሮቹ እንዲሁም በርካቶች ሐዘናቸውን ገልጸዋል።

 

 

ምንጭ፦አልጀዚራ

በአብርሃም ፈቀደ

You might also like
Comments
Loading...