Fana: At a Speed of Life!

ዶ/ር ወርቅነህ ከኳታር የውጭ ጉዳይ ሚኒስትር ዴኤታ ሱልጣን ቢን ሳድ አል ሞራኪሂ ጋር ተወያዩ

አዲስ አበባ፣ የካቲት 4፣ 2011 (ኤፍ.ቢ.ሲ) የውጭ ጉዳይ ሚኒስትር ዶክተር ወርቅነህ ገበየሁ ከኳታር የውጭ ጉዳይ ሚኒስትር ዴኤታ ሱልጣን ቢን ሳድ አል ሞራኪሂ ጋር ተወያዩ ።

ሚኒስትሮቹ  የሁለትዮሽና ሁሉን አቀፍ ግንኙነቶቻቸውን  ማጠናከር በሚቻልበት ሁኔታ ላይ ትኩረት አድርገው መወያየታቸው ነው የተነገረው፡፡

የሀገራቱ  ግንኙነት የሁለቱን ሀገራት ህዝቦች ጥቅም ማስጠበቅ ላይ ያተኮረ መሆኑን ነው ዶክተር ወርቅነህ የገለፁት፡፡

ይህንን ግንኙነታቸውም በአሁኑ በንግድ፣ ኢንቨስትመንት እና በህዝብ ለህዝብ ትስስር ማጠናከር እንዳለባቸው ገልጸዋል።

የኳታር የውጭ ጉዳይ ሚኒስትር ዴኤታ ሱልጣን ቢን ሳድ አል ሞራኪሂ በበኩላቸው ፥በጠቅላይ ሚኒስትር ዶክተር አብይ አህመድ እየተካሄደ ያለውን ሁሉን አቀፍ ለውጥ አድንቀዋል።

ኢትዮጵያ በአፍሪካ ቀንድ እና በቀጠናው ሰላም እንዲሰፍን እያደረገች ያለውን እንቅስቃሴም ሀገራቸው እንደምትደግፍ ተናግረዋል፡፡

ከዚህ ባለፈም  ሚኒስትሮቹ ሁለቱ ሀገራት የስራ ስምሪት ስምምነት ለመፈራረም በሚችልቡበት ሁኔታ ላይም መምከራቸው ነው የተገለፀው።

ከዚሁ ጋር በተያያዘ የተዘጋጀው ሰነድ ጉዳዩ በሚመለከታቸው አካላት ታይቶ በቅርቡ እንዲፈረም ስምምነት ላይ ደርሰዋል ነው የተባለው።

ኢትዮጵያ በመካከለኛው ምስራቅ የሚሰሩ ዜጎቿ መብት እንዲከበር በቅርቡ ከሳዑዲ ዓረቢያ እና ከተበባሩት አረብ ኤሚሪቶች ጋር የስራ ስምሪት ስምምነት መፈራረሟ ከውጭ ጉዳይ ሚኒስቴር ያገኘነው መረጃ ያመለክታል፡፡

በተጨማሪም ዶክተር ወርቅነህ ገበየሁ በዛሬው ዕለት ከኢሲዋቲኒ የውጭ ጉዳይና ዓለም አቀፍ ትብብር ሚኒስትር ቱሊ ድላድላ ጋር የሁለቱን ሀገሮች ግንኙነት ማጠናከር በሚቻልባቸው ጉዳዮች ዙሪያ ተወያይተዋል።

በውይይቱም ዶክተር ወርቅነህ ኢትዮጵያ እና ኢሲዋቲኒ በተለያዩ ዘርፎች ላይ ጥሩ ግንኙነት ያላቸው መሆኑን ተናግረዋል።

ሀገራቱ ግንኙነታቸውን ወደ ላቀ ደረጃ ለማሳደግም በንግድ፣ በኢንቨስትመንትና በህዝብ ለህዝብ ግንኙነት ላይ ትኩረት ሰጥተው መስራት ይገባቸዋል ነው ያሉት።

የኢሲዋቲኒ የውጭ ጉዳይና ዓለም አቀፍ ትብብር ሚኒስትር ቱሊ ድላድላ በኩላቸው፥የሁለቱን ሀገራት ግንኙነት ይበልጥ ለማጠናከር የወጣቶችና የህዝብ ለህዝብ የልምድ ልውውጥ ማድረግ አስፈላጊ መሆኑን አንስተዋል።

ከዚህ ባለፈም በአሁኑ ወቅት ሀገራቱ በኢኮኖሚና በንግድ ትስስር ዙሪያ ያላቸውን ግንኙነት ማጠናከር እንደሚገባ ጠቁመዋል ።

You might also like
Comments
Loading...