Fana: At a Speed of Life!

ህጋዊ ፍቃድ ሳይኖራቸው በሶሪያ የሚንቀሳቀሱ የውጭ ሃይሎች ሀገሪቷን ለቀው ሊወጡ ይገባል-ኢራን

አዲስ አበባ፣የካቲት 5፣2011 (ኤፍ ቢ ሲ) ኢራን በሶሪያ ህጋዊ መሰረት ሳይኖራቸው የሚንቀሳቀሱ ሃይሎች አካባቢውን ለቀው እንዲወጡ አሳሰበች።

በሶሪያ  ያለውን ቀውስ ለመፍታት በሀገሪቱ የሚንቀሳቀሱ የውጭ ሀገራት ወታደሮች አካባቢውን ለቀው መውጣት እንደሚገባቸው የኢራን የውጭ ጉዳይ ሚኒስትር ሞሃመድ ጃቫድ ዛሪፍ አሳስበዋል።

ሚኒስትሩ በትናንትናው ዕለት ከሊባኖስ አቻቸው ገብራን ባዚል ጋር በቤሩት  የሁለትዮሽ ውይይት ካካሄዱ በኋላ በሰጡት ጋዜጣዊ መግለጫ ነው ይህን የተናገሩት።

ዛሪፈ በመግለጫቸው ሁሉም የዓለም ሀገራት በሶሪያ ውስጥ ያለውን ቀውስ ለመፍታት በጋራ እና በቅንጅት መስራት እንደሚገባቸው አሳስበዋል።

ይህንን ለማሳካትም በሀገሪቱ ውስጥ የሚገኙ የውጭ ሀገራት ሃይሎች በሀገሪቱ የውስጥ ጉዳይ ላይ የሚያደርጉትን ጣልቃ ገብነት እንዲያቆሙ ጠይቀዋል ።

ሀገራቸውም በሶሪያ ያለውን የሰላም ችግር ለመፍታት ከፍተኛ ጥረት እያደረገች መሆኑን የተቀሱት ሚኒስትሩ፥ በሀገሪቱ አንድነት ላይ የሚቃጣ ማንኛውንም እንቅስቃሴ የሚቃወሙ መሆኑን አንስተዋል።

በተመሳሳይ የኢራን አብዮት ተባቂ ወታደሮች ከፍተኛ ሃላፊ በትናንትናው ዕለት በሶሪያ የሚገኙ የኢራን የምንጊዜም ባላንጣዎች ቀጠናውን ለቀው እንዲወጡ ማሳሰባቸው ይታወሳል።

መቋጫ ባልተገኘለት የሶሪያ የእርስ በርስ ጦርነት በርካታ ሰላማዊ ዜጎች ህይወታቸው ያለፈ ሲሆን ቁጥራቸው አያሌ የሆኑ ዜጎች ደግሞ ከቤት ንብረታቸው ተፈናቅለዋል።

ምንጭ፦presstv.com

You might also like
Comments
Loading...