Fana: At a Speed of Life!

የፊፋ የምስራቅ አፍሪካ ማስተባበሪያ ጽህፈት ቤት በአዲስ አበባ ተከፈተ

አዲስ አበባ፣ የካቲት 5፣ 2011 (ኤፍ.ቢ.ሲ) የዓለም አቀፉ የእግር ኳስ የበላይ አስተዳዳሪ ፊፋ የምስራቅ አፍሪካ ማስተባበሪያ ጽህፈት ቤት በአዲስ አበባ በይፋ ተከፈተ።

ጽህፈት ቤቱም የኢፌዴሪ የባህልና ቱሪዝም ሚኒስትር ዶክተር ሂሩት ካሳው እና የፊፋው ፕሬዚዳንት ጂያኒ ኢንፋንቲኖን ጨምሮ የኢፌዴሪ ስፖርት ኮሚሽን ኮሚሽነር አቶ ርስቱ ይርዳው፣ የኢትዮጵያ እግር ኳስ ፌዴሬሽን ፕሬዚዳንት አቶ ኢሳያስ ጅራ እንዲሁም ሌሎች የፊፋ ባለስልጣናት በተገኙበት በትናንትናው እለት ተመርቆ ተከፍቷል።

ፊፋ የምስራቅ አፍሪካ ማስተባበሪያ ጽህፈት ቤት የተቋቋመው የፊፋ አባል ከሆኑ የአፍሪካ ሀገራት ጋር ያለውን ግንኙነት ለማሻሻል እና እንዲሁም በስፖርት ልማት ዘርፍ ለሚያከናውኑት የልማት ስራዎችን ስዊዘርላንድ ዙሪክ ከሚገኘው የፊፋ ዋና ጽህፈት ቤት ጋር በመሆን በቅርበት ድጋፍ ለማድረግ መሆኑም ተነግሯል።

የፊፋው ፕሬዚዳንት ጂያኒ ኢንፋንቲኖ በምረቃ ስነ ስርዓቱ ላይ ባስተላለፉት መልእክት፥ “በአፍሪካ 3ኛ የሆነውን የፊፋ ማስተባበሪያ ጽህፈት ቤት በአዲስ አበባ ከተማ በመከፈቱ ደስታ ይሰማኛል” ብለዋል።

“የአዲስ አበባው ጽህፈት ቤት በምስራቅ አፍሪካ ቀጠና ካሉ አባል ሀገራት ጋር በቅርበት ለመስራት ያለንን ፍላጎት ከፍ የሚያደርግ እና በቀጠናው እግር ኳስን ለማሳደግ የሚደረገውን ጥረት የሚያሳድግ ነው” ብለዋል።

ቢሮው በአዲስ አበባ እንዲከፈት አስፈላጊውን ትብብር በሙሉ ላደረገው የኢትዮጵያ መንግስት ምስጋናቸውን አቅርበዋል።

የኢትዮጵያ እግር ኳስ ፌዴሬሽን ፕሬዚዳንት አቶ ኢሳያስ ጅራ በበኩላቸው፥ አዲሱ የፊፋ የማስተባበሪያ ጽህፈት ቤት የተከፈተው ኢትዮጵያ ፈጣን እና መሰረታዊ ለውጥ እያደረገች ባለበት ነው ብለዋል።

የአዲስ አበባው የፊፋ ማስተባበሪያ ጽህፈት ቤት ለረጅም ዓመታት በኢትዮጵያ እና በአፍሪካ እግር ኳስ ቤተሰቦች ዘንድ ማነቆ ሆነው የቆዩ ችግሮችን ይፈታል የሚል እምነት አንዳላቸውም ገልፀዋል።

በአዲስ አበባ የተከፈተው የፊፋ የማስተባበሪያ ጽህፈት ቤት በአፍሪካ 3ኛው በዓለም ደግሞ 11ኛው መሆኑን ፊፋ አስታውቋል።

ፊፋ ከዚህ ቀደም የማስተባበሪያ ጽህፈት ቤቶቹን በህንድ፣ በማሌዢያ፣ በኒውዚላንድ፣ በፓናማ፣ በፓራጉዋይ፣ በሴኔጋል፣ በደቡብ አፍሪካ ጆሃንስበርግና ባርባዶች እንዲሁም በተባበሩት አረብ ኢሚሬቶች ከፍቷል።

You might also like
Comments
Loading...