Fana: At a Speed of Life!

የድምጽ ብክለት ቁጥጥር ደንብ እየተዘጋጀ ነው ተባለ

አዲስ አበባ፣ ጥር 27፣ 2011 (ኤፍ.ቢ.ሲ) የድምጽ ብክለት ቁጥጥር ደንብን በማዘጋጀት ላይ መሆኑን የአካባቢ፣ የደንና የአየር ንብረት ለውጥ ኮሚሽን አስታወቀ።

ደንቡ የድምጽ ብክለት ምንጮችን በተለያዩ ቀጠናዎች መለየቱንም የኮሚሽኑ የሕግና ደረጃዎች ጥናትና ዝግጅት ዳይሬክተር ጄነራል ዶክተር አየለ ሄገና ገልጸዋል።

ዶክተር አየለ ቀጠናዎቹ በሚያወጡት የድምጽ መጠን መሠረት የመኖሪያ፣ የንግድ፣ የኢንዱስትሪ እና ቅይጥ በሚል መከፋፈላቸውንም ጠቅሰዋል።

እንዲሁም ፈቃድ ሰጪ አካል ለማንኛውም አገልግሎት ፈቃድ ሲሠጥ የቀጠናውን የድምጽ ልቀት መጠን መሠረት ያደረገ መሆን እንደሚገባውም በደንቡ ተካቷል።

ደንቡ የድምፅ ብክለትን ለመከላከል የሚያስችሉ የቴክኖሎጂ ውጤቶች ከቀረጥ ነፃ በሆነ መልኩ ወደ ሀገር ውስጥ እንዲገቡ ያስችላል ተብሏል።

ዶክተር አየለ የሚወጣው ህግ ተፈጻሚ በሚሆንበት ወቅትም አስፈጻሚው አካል ብክለትን የመቆጣጠርና አስተዳደራዊ እርምጃ እንዲወሠድ ማስረጃዎችን የመሠብሠብ እንዲሁም የሚወሠነውን ውሳኔ ወይም ማንኛውም ሕጋዊ እርምጃ እንዲፈጸም የማድረግ ኃላፊነት እና ሌሎችም እንደተካተቱበት ገልጸዋል።

የድምጽ ብክለት በጤና ላይ የመስማት ችሎታ እንዲቀንስ፣ በነርቮች ላይ ጉዳት እንዲደርስ፣ በልብ ጤናማ አሠራርን የማወክ፣ በማሕበራዊ ኑሮ ላይ የመቻቻልና አጠቃላይ ማሕበራዊ ትስስርን መቀነስ፣  በኢኮኖሚ ላይ በንብረት፣ አገልግሎቶች ጥራትና ዋጋ ላይ አሉታዊ ተጽዕኖ ማሣደር፣ ምርታማነትን መቀነስ እንደሚያስከትል ጥ።ናቶች ያመለክታሉ

ደንቡ በሥራ ላይ ያለውን የብክለት አዋጅ በተለይም በድምጽ ብክለት ዙሪያ ያለውን ችግር ለመፍታት የሚያስችል ማስፈጸሚያ መሆኑንም ዶክተር አየለ ሄገና መግለጻቸውን ከኮሚሽኑ ያገኘነው መረጃ ያመለክታል።

 

በአብርሃም ፈቀደ

You might also like
Comments
Loading...